2026-2027-oqıw jılınan baslap ulıwma orta bilim beriw mekteplerinde oqıwshılardıń bilimin bahalawdıń jańa sisteması basqıshpa-basqısh engizilmekte.
Ózbekstan Respublikası Mektepke shekemgi hám mektep bilimlendiriwi ministrliginiń 2026-jıl 23-iyuldaǵı 266-sanlı buyrıǵı menen jańa bahalaw sistemasın nátiyjeli engiziw maqsetinde mektep basshıları hám pedagog xızmetkerleri ushın oqıw-treninglerdi shólkemlestiriw hám ótkeriw kestesi tastıyıqlanǵan.
Usı tiykarda 13-avgust kúni Nókis qalasındaǵı Muxammed al-Xorezmiy atındaǵı qánigelestirilgen mekteptiń Nókis filialında oqıw-treningler shólkemlestirildi.
Treningler Ózbekstan Respublikası Mektepke shekemgi hám mektep bilimlendiriwi ministrliginiń juwaplı qánigeleri, e-Mektep platforması, sonday-aq, Pedagogikalıq sheberlik hám xalıqaralıq bahalaw ilimiy-ámeliy orayınıń qánigeleri tárepinen alıp barıldı.
Oqıw-treninglerde:
➖ jańa bahalaw sisteması engiziletuǵın mekteplerdiń oqıw isleri boyınsha direktor orınbasarları hám tájiriybeli oqıtıwshıları;
➖ rayon hám qalalıq mektepke shekemgi hám mektep bilimlendiriwi bólimleriniń tiyisli bas metodistleri – jámi 240 pedagog qatnastı.
Qaraqalpaqstanda jańa bahalaw sisteması: sanlarda
2025-2026-oqıw jılınan baslap oqıwshılardıń bilimin bahalawdıń jańa tártibi 156 ulıwma bilim beriw mektebinde engizildi.
Nátiyjede Qaraqalpaqstan Respublikasında jańa bahalaw sisteması engizilgen mekteplerdiń sanı 234 ke (31,8%) jetkerildi.
2025-2026-oqıw jılınıń 1-4-sherek juwmaqları boyınsha:
– 231 mektepte – onlayn;
– 3 mektepte – oflayn oraylasqan halda shereklik summativ bahalaw (ShSB) ótkerildi.
1-4-sherekler dawamında 234 mekteptiń 5-11-klass oqıwshıları bahalanıp, ulıwma ózlestiriw kórsetkishi 76 payızdı quradı.
2026-2027-oqıw jılında bolsa jáne 116 ulıwma bilim beriw mektebinde bahalawdıń jańa tártibin engiziw rejelestirilgen.
Nátiyjede Qaraqalpaqstan Respublikasında oqıwshılardıń bilimin bahalawdıń jańa sisteması engizilgen mekteplerdiń sanı 350 ge (47,6 payız) jetkeriledi.
