Ózbekstan Respublikası Prezidentiniń “Mektepten tısqarı bilimlendiriw sistemasın jańa basqıshqa alıp shıǵıw ilajları haqqında”ǵı 2025-jıl 8-sentyabrdegi PP-277 sanlı qararı boyınsha zamanagóy kózqaraslar arqalı balalardıń bos waqıtların mazmunlı hám nátiyjeli shólkemlestiriw, olardı intellektuallıq jaqtan jetik Watanǵa sadıqlıq, tariyx hám milliy mádeniyatımızǵa húrmet ruwxında tárbiyalaw, mektepten tısqarı bilimlendiriw sistemasın zaman talapları tiykarında jetilistiriw maqsetinde Qaraqalpaqstan Respublikasında 1 Respublikalıq hám 17 rayonlıq, qalalıq “Keleshek” orayları shólkemlestirildi.
Oraylarda oqıwshılarda zamanagóy hám talap joqarı bolǵan kásiplerge qızıǵıwshılıq oyatıw, interaktiv bilimlendiriw ortalıǵın qáliplestiriw arqalı balalardıń ilimiy, texnikalıq, dóretiwshilik hám sport baǵdarındaǵı potencialın júzege shıǵarıw maqsetinde 10 baǵdar (“Mádeniyat hám kórkem óner,” “Málimleme texnologiyaları,” “Dene tárbiyası hám sport,” “Kásip-óner,” “Turizm hám ekologiya,” “Ilim,” “Shet tiller,” “Mektepke tayarlıq,” “Kitapqumarlıq,” “Prezident dóretiwshilik hám qánigelestirilgen mekteplerge tayarlıq”) boyınsha dógerekler jumısı jolǵa qoyıldı.

Házirgi kúnde, oraylardaǵı jámi 704 dógerekke 6 jastan 18 jasqa shekemgi 19352 oqıwshı tartılǵan bolıp, olarǵa jámi 691 pedagog kadrlar, sonnan 325 joqarı (47%), 215 orta-arnawlı hám 149 tamamlanbaǵan joqarı maǵlıwmatlı pedagog kadrlar bilim berip kelmekte.
Sonday-aq, “Keleshek” oraylarınıń ulıwma orta bilim beriw shólkemlerinde vertikal sistemasın engiziw maqsetinde oqıwshılardıń baslamaların qollap-quwatlaw boyınsha Qaraqalpaqstan Respublikasındaǵı 128 mektepte 107 mektep keńesgóyi saylandı hám óz jumısların dawam ettirmekte.