“Birden-bir psixologiyalıq xızmet: oqıwshı, ata-ana hám pedagoglar menen birgelikte islewde jeke rawajlanıw, salamat ortalıq hám unamlı ózgerislerdi qáliplestiriw” atamasında Respublikalıq seminar shólkemlestirildi. Onda Qaraqalpaqstan Respublikası Mektepke shekemgi hám mektep bilimlendiriwi ministriniń birinshi orınbasarı Aybek Dauletbaev, Qaraqalpaqstan Respublikası prokurorınıń aǵa járdemshisi Eleanora Kaipova, Qaraqalpaqstan Respublikası Ishki isler jámiyetlik qáwipsizlik xızmeti Huqıqbuzarlıqlar profilaktikası basqarması baslıǵınıń orınbasarı Hurzada Reymqulova hám mektep psixologları qatnastı. Seminar dawamında mektep psixologlarınıń kásiplik bilim hám kónlikpelerin zamanagóy ilimiy qatnaslar, innovaciyalıq metodlar hám ámeliy psixologiya tájiriybesi tiykarında bayıtıwǵa ayrıqsha itibar qaratıldı. Sonıń ishinde, oqıwshılardıń jas hám individual psixologiyalıq ózgesheliklerin anıqlaw, stress, kelispewshilik hám krizisli jaǵdaylarda nátiyjeli psixologiyalıq járdem kórsetiw, ata-analar hám pedagoglar menen konstruktivlik qarım-qatnas ornatıw, bilimlendiriw processinde motivaciyanı arttırıw hám unamlı psixologiyalıq ortalıq jaratıw máseleleri dodalandı. Sonday-aq, psixologlar arasında tájiriybe almasıw, ámeliy kónlikpelerdi rawajlandırıw, profilaktika hám psixologiyalıq járdem sistemasın jetilistiriw hám mektep jámáátinde salamat qarım-qatnas, óz-ara húrmet hám birge islesiw ortalıǵın qáliplestiriw boyınsha ámeliy shınıǵıwlar shólkemlestirildi. Maqset – hár bir oqıwshınıń psixologiyalıq talabın esapqa alǵan halda, bilimlendiriw processinde salamat hám unamlı ortalıqtı támiyinlew jáne mektep psixologlarınıń jumıs nátiyjeliligin jáne de arttırıw.