Rásmiy múnásibet
Sociallıq tarmaqlarda Xojeli rayonı 8-sanlı ulıwma orta bilim beriw mektebiniń 5 oqıtıwshısınıń qatnasıwında jol-transport hádiysesi júz bergeni boyınsha hár qıylı pikirler bildirilmekte.
Bul jaǵday boyınsha tómendegilerdi málim etemiz.
2026-jıl 15-sentyabr kúni saat 15:30 lar shamasında mekteptiń 5 pedagog xızmetkeri oqıwshılardıń jaǵdayınan xabar alıw, shańaraqlıq sharayatın úyreniw, qatnasın qadaǵalaw hám olardıń oqıwdan shette qalıwınıń aldın alıw maqsetinde shańaraqlarǵa barǵan.
Mektepke qaytıw waqtında pedagoglar Damas markalı avtotransport quralında háreketlenip atırǵanda aydawshı basqarıwdı joǵaltıwı aqıbetinde transport quralı jol shetine shıǵıp ketken.
Úyreniwler dawamında hádiyse aqıbetinde pedagog xızmetkerlerdiń hesh biri dene jaraqatın almaǵanı, emlewxanaǵa múrájat etilmegeni hám avtotransport quralına materiallıq zıyan jetkerilmegeni anıqlandı.
Sonday-aq, hádiyse aqıbetinde dene jaraqatı yamasa materiallıq zıyan kórilmegenligi sebepli bul jaǵday boyınsha rayonlıq Ishki isler bólimine múrájat etilmegen.
Házirgi waqıtta pedagog xızmetkerlerdiń barlıǵınıń densawlıǵı jaqsı bolıp, óz jumıs ornında wazıypaların atqarmaqta.
