Ellikqala rayonındaǵı shańaraqlıq mámleketlik emes mektepke shekemgi bilimlendiriw shólkeminde balalar ushın jaratılǵan sharayatlar haqqında
Rásmiy múnásibet
Usı jıldıń 15-oktyabr kúni sociallıq tarmaqlarda Ellikqala rayonındaǵı shańaraqlıq mámleketlik emes mektepke shekemgi bilimlendiriw shólkemlerinen birinde tárbiyalanıp atırǵan balalar ushın jaratılǵan sharayatlar sáwlelendirilgen video tarqaldı.
Tarqatılǵan materiallarda balalardıń jataqxanadaǵı sharayatları sáwlelengen bolıp, jaǵday boyınsha Qaraqalpaqstan Respublikası Mektepke shekemgi hám mektep bilimlendiriwi ministrligi, Ellikqala rayonı Mektepke shekemgi hám mektep bilimlendiriwi bólimi, Sanitariyalıq-epidemiologiyalıq tınıshlıq hám jámiyet salamatlıǵın saqlaw bólimi juwapkerleri tárepinen ornına shıqqan halda úyreniw jumısları alıp barıldı.
Jaǵday boyınsha islengen jumıslar:
Úyreniw dawamında Ellikqala rayonı Abay MPJ, Atajan Xudayshukur kóshesi, 41-jayda jaylasqan, jeke tártiptegi isbilermen Jangabaeva Aydana Musatay qızı tárepinen shólkemlestirilgen, 30 balaǵa mólsherlengen shańaraqlıq mámleketlik emes mektepke shekemgi bilimlendiriw shólkeminde sanitariyalıq-gigienalıq talaplarǵa ámel etiliwi hám tárbiyalanıwshılar ushın jaratılǵan sharayatlar kózden ótkerildi.
Úyreniw nátiyjesinde shólkemde ońlaw jumısların ámelge asırıw rejelestirilgeni sebepli mebeller ornınan kóshirilgeni, jataqxana eki bólmege jaylastırılǵanı, birinshi bólmede 8 krovat bar ekenligi, ekinshi bólmedegi krovatlar bolsa sırtqa shıǵarılǵanı anıqlandı. Sonday-aq, shólkemde jámi 10 eki qabatlı krovat bar ekenligi málim boldı.
Úyreniw processinde Ózbekstan Respublikası Densawlıqtı saqlaw ministrliginiń 0016-21-sanlı sanitariya qaǵıydaları hám normaları (SanQvaM) talaplarınıń buzılǵanlıǵı anıqlandı.
Anıqlanǵan kemshiliklerdi saplastırıw, balalardıń ómiri hám densawlıǵın qorǵaw jáne olar ushın belgilengen talaplarǵa muwapıq sharayatlardı támiyinlew maqsetinde shańaraqlıq mámleketlik emes mektepke shekemgi bilimlendiriw shólkeminiń jumısı tiyisli juwmaq berilgenge shekem waqtınsha toqtatıldı.
Bul jaǵday juwapker shólkemler qadaǵalawına alınǵan bolıp, balalar ushın qáwipsiz hám sanitariyalıq-gigienalıq talaplarǵa sáykes sharayatlar jaratılıwı boyınsha tiyisli ilajlar kórilmekte.
QR Mektepke shekemgi hám mektep bilimlendiriw ministrliginiń Málimleme xızmeti
