Mektep oqıwshıları ushın ashıq sáwbet ótkerildi

Nókis qalasındaǵı “Sanaat qurılıs bank”te “Pútkil jer júzilik amanatlar kúni — 2026” (World Savings Day) ilajlarına start berildi.

15-oktyabrden 15-noyabrge shekem dawam etetuǵın bul ilajlar Mektepke shekemgi hám mektep bilimlendiriwi ministrligi, Oraylıq bank hám kommerciyalıq bankler menen birgelikte oqıwshılardıń finanslıq sawatlılıǵın arttırıwǵa qaratılǵan.

Ilajdıń ashılıw máresiminde Qaraqalpaqstan Respublikası Mektepke shekemgi hám mektep bilimlendiriwi ministrliginiń wákilleri, “Sanaat qurılıs bank” xızmetkerleri hám Nókis qalasındaǵı 46, 36, 52-sanlı mekteptiń belsendi oqıwshıları qatnastı.

Qatnasıwshılarǵa qarjını durıs basqarıw, qarjılardı únemlew, toplawdıń áhmiyeti hám finanslıq juwapkershilik haqqında túsinikler berildi.

Tiykarǵı maqset — jaslarda puldı aqılǵa uǵras jumsaw, qarjını únemlew hám keleshek ushın jıynaw kónlikpelerin qáliplestiriw, olardı finanslıq jaqtan juwapkershilikli qararlar qabıl etiwge úyretiwden ibarat.