Búgin Nókis qalası Temurbekler mektebinde Qaraqalpaqstan Respublikası Mektepke shekemgi hám mektep bilimlendiriw ministrligi tárepinen «kkbilimlendiriw.uz» online platformasınan tolıq paydalanıwdı hám bilimlendiriw tarawın rawajlandırıw ushın jaratılıp atırǵan jańalıqlardı ámeliyatqa engiziw maqsetinde Baspasóz konferensiyası ótkerildi. Baspasóz konferensiyada Qaraqalpaqstan Respublikası Mektepke shekemgi hám mektep bilimlendiriw ministri G.Kojabaeva, Respublikalıq bilimlendiriw orayınıń direktor orınbasarı N.Fayzullaev, rayon (qala)lıq mektepke shekemgi hám mektep bilimlendiriw bólimlerdiń málimleme-kommunikaciya texnologiyaların engiziw hám sanlastırıw boyınsha qánigeler, mektep direktorları hám oqıw isleri boyınsha direktor orınbasarları, joqarı oqıw orınlarına oqıwshılardı turaqlı túrde tayarlap kiyatırǵan (repetitor) muǵallimler, ǵalaba xabar quralları qatnastı. Platformanıń tiykarǵı maqseti oqıwshılardı interaktiv usıllar járdeminde oqıwǵa degen qızıǵıwshılıǵın arttırıw hám oqıwshınıń qábiletine qarap online teslerdi sheship óz ústinde elede islewin kúsheytiw, jánede joqarı oqıw orınlarına kiriw ushın tayarlanıp júrgen mektep pitkeriwshileriniń bilim dárejesin anıqlawdan ibarat. Plarformanıń qolaylıqları: – muǵallimler hesh qanday qıyınshılıqlarsız oqıwshılarınıń bilim dárejesin tekseriw maqsetinde óz qánigeligine qarap oqıwshılarınan bir waqıtta testlerdi alıp hám sol waqıttıń ózinde oqıwshısınıń bilim dárejesin baqlaw imkanıyatına iye; – platformanıń arnawlı baǵdarlama bólimindegi test generatorları járdeminde ózinde bar sorawlardan testlerdi hár túrli usılda tayarlaw imkaniyatına iye. Házirgi kúnde kkbilimlendiriw.uz platforması járdeminde barlıq rayonlıq (qala) mekteplerdiń oqıwshılarınan sırtqı monitoring test alıw rejelestirilmekte. Baspasóz konferensiya soraw-juwaplar menen dawam etti. 
