2024-2025-oqıw jılı 1-sherek juwmaqları menen «Qaraqalpaqstan tájriybesi» Ámiwdárya rayonı mısalında barlıq ulıwma orta bilim beriw mektepleriniń 9-klass oqıwshıları qatnasında bilim sapası sırtqı (onlayn) monitoringi respublikada birinshilerden tájriybe-sınaw sıpatında ótkerilgen edi. Tájriybe-sınaw juwmaqları óziniń unamlı sheshimin taptı.
Atap-aytqanda, monitoring nátiyjelerinde ulıwma bilim beriw pánlerinen oqıwshılarda anıqlanǵan boslıqlardı tolıqtırıw boyınsha Respublikalıq bilimlendiriw hám de pedagoglar sheberlik orayları metodistleri tárepinen metodikalıq járdem kórsetiw maqsetinde metodikalıq usınıslar, sabaq islenbeler hám de úlgili tapsırmalar islep shıǵılıp, barlıq ulıwma orta bilim beriw mekteplerine en jaydırıldı.
Sonıda ayrıqsha atap ótiwimiz kerek, Ózbekstan Respublikası Mektepke shekemgi hám mektep bilimlendiriw ministrliginiń ruxsatı menen arnawlı reje-keste tiykarında 2025-jıl dawamında «Qaraqalpaqstan tájriybesi» Ámiwdárya rayonı mısalında birinshi ret barlıq qala, rayonlardaǵı ulıwma orta bilim beriw mektepleriniń 9-klass oqıwshıları qatnasında bilim sapası sırtqı (onlayn) monitoringin ótkeriwge start berilmekte.
Usı jıldıń fevral ayınıń úshinshi on kúnliginde Tórtkúl, Ellikqala hám de Beruniy rayonlarındaǵı barlıq ulıwma orta bilim beriw mekteplerinde bilim sapası sırtqı (onlayn) monitoringi ótkeriliwi rejelestirilmekte.
Sırtqı monitoringti ótkeriwdegi maqset:
Ulıwma orta bilim beriw mekteplerinde oqıwshılardı ǵalabalıq túrde ádil bahalaw, oqıwshılarǵa oqıw-tárbiya processine tálim-tárbiyanıń nátiyjeli usılları hám ulıwma bilim beriw pánleri boyınsha oqıwshılardıń ózlestiriwin turaqlı qadaǵalaw, mámleketlik bilimlendiriw standartları talaplarınıń orınlanıwı, oqıwshılardıń bilimi hám bilimlendiriw sapasına keri tásir etiwshi faktorlardı anıqlaw hám olardı tolıqtırıwdan ibarat.
