Usı jılı 30-aprel kúni Qaraqalpaqstan Respublikası Mektepke shekemgi hám mektep bilimlendiriw ministrliginiń májilisler zalında “Bilimlendiriw tarawında korrupciya jaǵdaylarınıń aldın alıw hám oǵan qarsı gúresiw” atamasında keńeytilgen májilis bolıp ótti.
Ilajda Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva, Qaraqalpaqstan Respublikası prokurorınıń aǵa járdemshisi Beket Agitaev, Jınayat isleri boyınsha sudınıń sudyası Rasul Nazarov, Ádillik ministrliginiń sektor baslıǵı Nuriya Berdiniyazova, sonday-aq, ministrliktiń xızmetkerleri, rayonlıq hám qalalıq mektepke shekemgi hám mektep bilimlendiriw bólimleriniń baslıqları, mektep hám mektepke shekemgi bilimlendiriw mákemeleriniń basshıları qatnastı.
Májilisti Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva ashıp berdi hám alıp bardı.
Májilis dawamında 2024-jıl dawamında bilimlendiriw sistemasında júz bergen korrupciyalıq jınayatlar tereń talqılandı. Sonıń ishinde, ayırım mektep direktorları hám olardıń orınbasarları tárepinen jumısqa qabıl etiwde para alıp atırǵanı, wáde ornına nızamsız háreketlerge jol qoyıp atırǵanı boyınsha keskin sın pikirler bildirildi. Bul jaǵdaylar bilimlendiriw tarawında jámiyetshilik isenimine zıyan keltirip atırǵan faktorlardan biri ekeni atap ótildi.
Ilaj dawamında shıǵıp sóylegen prokuratura, sud hám ádillik uyımlarınıń wákilleri tárepinen korrupciya jaǵdaylarına huqıqıy baha beriliwi, nızamshılıqta belgilengen ilajlar kóriliwi boyınsha maǵlıwmatlar berildi. Bilimlendiriw sisteması xızmetkerleriniń huqıqıy sawatlılıǵın arttırıw, ashıq-aydınlıqtı támiyinlew, ashıq-aydın sóylesiwler arqalı mashqalalardı sheshiw zárúr ekenligi ayrıqsha atap ótildi.
Sonday-aq, 2025-jıldıń birinshi shereginde anıqlanǵan korrupciyalıq jaǵdaylar boyınsha xızmet tekseriwleriniń nátiyjeleri, jınayat isleri hám kórilip atırǵan ilajlar boyınsha maǵlıwmatlar berildi.
QR Mektepke shekemgi hám mektep bilimlendiriw ministrliginiń Málimleme xızmeti
