Ózbekstan Respublikası Mektepke shekemgi hám mektep bilimlendiriwi ministrliginiń 2025-jıl 30-apreldegi Korrupciyaǵa qarsı gúresiw aylıǵın ótkeriw haqqındaǵı arnawlı buyrıǵınıń orınlanıwın támiyinlew maqsetinde Nókis qalasındaǵı “Temurbekler mektebi” áskeriy akademiyalıq liceyinde keń kólemli Respublikalıq seminar hám ashıq sáwbet shólkemlestirildi.

Ilajdıń tiykarǵı maqseti – bilimlendiriw tarawında júzege kelip atırǵan korrupciyalıq jaǵdaylardıń aldın alıw, bar mashqalalardı ashıq-aydın dodalaw hám bul baǵdardaǵı juwapkershilikti arttırıwdan ibarat boldı.

Ilajdı Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva ashıp berdi hám basqarıp bardı.

Bul ashıq sáwbette,  Ózbekstan Respublikası Bas prokuraturası janındaǵı Huqıqtı qorǵaw akademiyası Xalıqaralıq huqıq hám insan huqıqların qorǵaw kafedrası oqıtıwshısı Sh.Xalilov, Qaraqalpaqstan Respublikası prokurorınıń aǵa járdemshisi B.Agitaev, Jınayat isleri boyınsha Nókis qalalıq sudınıń baslıǵı Sh.Shamambetov, Qaraqalpaqstan Respublikası Ádillik ministrliginiń qánigesi B.Matjanova, ministr orınbasarları, bólim baslıqları, rayon (qala) bilimlendiriw bólimi baslıqları, mektepke shekemgi hám mektep direktorları hám ǵalaba xabar quralları qatnastı.

 Ilaj dawamında bilimlendiriw sistemasında ushırasıp atırǵan korrupciyalıq jaǵdaylar hám olardıń aqıbetleri keń túrde dodalandı. Shıǵıp sóylegenler bunday unamsız illetlerdiń tamırları haqqında pikir bildirip, basshılardıń jeke juwapkershiligi eń tiykarǵı faktor ekenin ayrıqsha atap ótti.

Sın kózqaras ruwxında ótken sáwbette korrupciyaǵa qarsı gúresiw baǵdarındaǵı ámeliy ilajlar, ashıq-aydınlıqtı támiyinlew hám puqaralıq qadaǵalawdı kúsheytiw zárúrligi atap ótildi.

Bul ilaj korrupciyaǵa qarsı gúresiwde birge islesiwdi bekkemlew, halıslıq hám hadallıq ortalıǵın qáliplestiriw jolında áhmiyetli qádem boldı.

QR Mektepke shekemgi hám mektep bilimlendiriw ministrliginiń Málimleme xızmeti