Ájiniyaz atındaǵı Nókis mámleketlik pedagogikalıq institutında elimiz boylap náshebentlik hám narkojınayatlarǵa qarsı gúresiw boyınsha milliy strategiyanı ámelge asırıwdıń áhmiyetli máselelerine arnalǵan seminar bolıp ótti.
Seminarǵa Ózbekstan Respublikası Prezidenti Administraciyası janındaǵı Narkotiklerdi qadaǵalaw milliy orayınıń bas ilimiy xızmetkeri Janibek Yusupov, Ishki isler ministrligi Operativ-izlew departamenti Jınayat-izlew xızmetiniń juwaplı xızmetkeri Nodirbek Abdurasulov, Qaraqalpaqstan Respublikası Mektepke shekemgi hám mektep bilimlendiriwi ministriniń orınbasarı Qadirbay Ismayılov, Respublikalıq oqıwshılardı kásip-ónerge baǵdarlaw hám psixologiyalıq-pedagogikalıq diagnoz orayınıń metodisti Rahmonjon Abdullaev, Respublikalıq qánigelestirilgen ruwxıy salamatlıq ilimiy-ámeliy medicinalıq orayı Qaraqalpaqstan Respublikası filialı narkolog shıpakeri Bóribay Qayıpnazarov, sonday-aq, instituttıń jaslar tálim-tárbiyası boyınsha juwapkerleri, ulıwma bilim beriw mektepleriniń psixolog hám inspektor-psixologları qatnastı.
Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov shıǵıp sóylep, náshebentlik hám psixotrop zatlar mashqalası búgingi kúnniń eń global hám aktual mashqalalarınıń biri ekenligin atap ótti. Ásirese, jaslar arasında bul illetlerdiń tarqalıwı jámiyetimiz ushın úlken qáwip tuwdıradı.
Seminarda sózge shıqqanlar tárepinen bul mashqalanıń aldın alıw hám jaslardı usınday zıyanlı illetlerden saqlap qalıw ushın túsindiriw jáne úgit-násiyat jumıslarınıń nátiyjeliligin arttırıwdıń áhmiyeti joqarı ekenligi ayrıqsha tilge alındı.
Náshebentlik hám psixotrop zatlardan paydalanıw tek ǵana insannıń fizikalıq salamatlıǵına keri tásirin tiygizip qoymastan, ruwxıy salamatlıǵı hám jámiyetlik turmısında da ornı tolmas joǵaltıwlarǵa alıp keledi. Náshebentlik ádetlerine berilgen jaslar oqıw, jumıs hám jeke turmısında joqarı nátiyjelerge erise almaydı, shańaraq aǵzaları hám dosları menen qarım-qatnasında mashqalalar júz berip, sociallıq izolyaciyaǵa túsip qaladı.
Bunıń aldın alıw ushın jaslar arasında turaqlı túrde ruwxıy-aǵartıwshılıq úgit-násiyat jumısların shólkemlestirip, jaslarǵa salamat turmıs tárizi hám náshebentlikten awlaq bolıw usılları haqqında maǵlıwmatlar berip barıw áhmiyetli esaplanadı.
Sonıń menen birge, shańaraq hám jámiyettiń rolin arttırıw, nızamshılıq hám jámiyetlik qadaǵalawdı kúsheytiw, jaslar ushın psixologiyalıq járdem kórsetiw hám reabilitaciyalıq jumıslardı jolǵa qoyıw náshebentlik hám psixotrop zatlardıń jaslar arasında tarqalıwınıń aldın alıwǵa xızmet etedi.
Seminar dawamında qatnasıwshılar ózlerin qızıqtırǵan sorawlarǵa qánigelerden tolıq juwaplar aldı.
Ilajda sózge shıqqanlar bul mashqalanıń aldın alıw ushın jámiyettiń barlıq qatlamları, sonıń ishinde, ata-analar, pedagog xızmetkerler, mámleketlik hám mámleketlik emes shólkemler birgelikte jumıs alıp barıwı zárúr ekenligi, tek ǵana birgeliktegi háreketler arqalı jaslardı náshebentlik hám psixotrop zatlardan qorǵaw, sonday-aq, salamat hám jetiskenliklerge tolı ómir jolın kórsetiw múmkinligin atap ótti.
