“Ózbekstan bayraǵı – milliy maqtanısh hám ǵárezsizlik tımsalı”

ÓZBEKSTAN BAYRAǴI TEMASINDA “KELESHEK SAATÍ” ÓTKERILDI

Búgin Nókis qalasındaǵı 55-sanlı ulıwma bilim beriw mektebinde “Keleshek saatı” sheńberinde “Ózbekstan bayraǵı” temasına baǵıshlanǵan ruwxıy-aǵartıwshılıq sabaq shólkemlestirildi.

Sabaq processinde Qaraqalpaqstan Respublikası Mektepke shekemgi hám mektep bilimlendiriwi ministri Gulistan Kojabaeva, ministr orınbasarı Qadirbay Ismaiylov, sonday-aq, Qaraqalpaqstan Respublikası prokurorınıń úlken járdemshisi Beket Agitaev oqıwshılarǵa mámleketlik bayraqtıń mámleketlik belgisi sıpatındaǵı ornı hám áhmiyeti haqqında tolıq maǵlıwmat berdi.

Ilajda Ózbekstan Respublikası mámleketlik bayraǵı xalqımızdıń kóp ásirlik tariyxıy dástúrleri, bay ruwxıy miyrası hám milliy ózligimizdi jámlestiretuǵın áhmiyetli tımsal ekeni atap ótildi. Sonday-aq, bayraq mámleketimizdiń dúnya jámiyetshiligindegi múnásip ornın belgileytuǵın belgi sıpatında ayrıqsha atap ótildi.

Bunnan tısqarı, 20-noyabr – “Jer júzilik balalar kúni” múnásibeti menen bala huqıqların qorǵaw, Bala huqıqları haqqındaǵı konvenciya principleri hám onıń global rawajlanıw maqsetleri menen baylanıslılıǵı boyınsha da oqıwshılarǵa áhmiyetli maǵlıwmatlar jetkerildi.

Ilaj juwmaǵında, oqıwshılarda mámleketlik nıshanlarǵa húrmet, Watanǵa sadıqlıq sezimlerin kúsheytiw, sonday-aq, bala huqıqların húrmet etiwge baylanıslı bilim hám túsiniklerdi bekkemlewge qaratılǵan bul aǵartıwshılıq shınıǵıw barlıq qatnasıwshılarda úlken tásir qaldırdı.

QR Mektepke shekemgi hám mektep bilimlendiriw ministrliginiń Málimleme xızmeti