Ózbekstan Respublikası Mektepke shekemgi hám mektep bilimlendiriw ministrliginiń 2025-jıl 28-oktyabrdegi Korrupciyaǵa qarsı gúresiw aylıǵın ótkeriw haqqındaǵı arnawlı buyrıǵınıń orınlanıwın támiyinlew maqsetinde ashıq sáwbet hám ashıq esikler kúni ótkerildi.

Ilajdıń tiykarǵı maqseti – bilimlendiriw tarawında júzege kelip atırǵan korrupciyalıq jaǵdaylardıń aldın alıw, bar mashqalalardı ashıq-aydın dodalaw hám bul baǵdardaǵı juwapkershilikti arttırıwdan ibarat boldı.

Ilajdı Qaraqalpaqstan Respublikası Mektepke shekemgi hám mektep bilimlendiriwi ministri Gulistan Kojabaeva ashıp berdi hám basqarıp bardı.

Onda Ózbekstan Respublikası Mektepke shekemgi hám mektep bilimlendiriw ministrliginiń juwaplı wákilleri, huqıq qorǵaw uyım xızmetkerleri, ministr orınbasarları, bólim baslıqları, rayon (qala) bilimlendiriw bólimi baslıqları, mektepke shekemgi hám mektep direktorları, oraylıq studiyadan 670, jámi 1500 den zıyat taraw xızmetkerleri hám ǵalaba xabar quralları qatnastı.

Ilaj dawamında bilimlendiriw sistemasında ushırasıp atırǵan korrupciyalıq jaǵdaylar hám olardıń aqıbetleri keń túrde dodalandı. Shıǵıp sóylegenler bunday unamsız illetlerdiń tamırları haqqında pikir bildirip, basshılardıń jeke juwapkershiligi eń tiykarǵı faktor ekenin ayrıqsha atap ótti.

Sın kózqaras ruwxında ótken sáwbette korrupciyaǵa qarsı gúresiw baǵdarındaǵı ámeliy ilajlar, ashıq-aydınlıqtı támiyinlew hám puqaralıq qadaǵalawdı kúsheytiw zárúrligi atap ótildi.

Bul ilaj korrupciyaǵa qarsı gúresiwde birge islesiwdi bekkemlew, hadallıq ortalıǵın qáliplestiriw jolında áhmiyetli qádem boldı.

QR Mektepke shekemgi hám mektep bilimlendiriw ministrliginiń Málimleme xızmeti