Qaraqalpaqstan Respublikası Mektepke shekemgi hám mektep bilimlendiriw ministrligi hám Beruniy rayonı hákimliginiń 2025-jıl 28-oktyabrdegi qospa qararı tiykarında tastıyıqlanǵan “Beruniy rayonı ulıwma orta bilim beriw mekteplerinde bilimlendiriwdiń sapasın hám mazmunın bunnan bılay da arttırıw boyınsha ilajlar rejesi”niń orınlanıwın támiyinlew maqsetinde seminar shólkemlestirildi.

Bul seminar Beruniy rayonı ulıwma orta bilim beriw mektepleriniń oqıw isleri boyınsha direktor orınbasarları ushın ótkerildi. Onda Qaraqalpaqstan Respublikası Bilimlendiriw orayı hám Pedagogikalıq sheberlik orayınıń xızmetkerleri qatnasıp, bilimlendiriwdiń sapasın arttırıw, oqıw processin nátiyjeli shólkemlestiriw, zamanagóy qatnas hám metodlardı ámeliyatqa engiziw boyınsha áhmiyetli túsinik hám usınıslar berdi.

Sonday-aq, Mektepke shekemgi hám mektep bilimlendiriw ministriniń 2025-jıl 26-maydaǵı “2025-2026-oqıw jılında bilimlendiriw dárejesi joqarı bolmaǵan mektepler dizimin tastıyıqlaw haqqında”ǵı arnawlı buyrıǵı tiykarında bilimlendiriw dárejesi joqarı bolmaǵan Ámiwdárya rayonındaǵı 72-sanlı, Taxtakópir rayonındaǵı 22-sanlı hám Shomanay rayonındaǵı 30-sanlı ulıwma orta bilim beriw mektepleriniń muǵallimlerine Respublikalıq bilimlendiriw orayınıń pán metodistleri tárepinen “Metodik-tur” joybarı sheńberinde metodikalıq seminar ótkerildi hám bul mekteplerdiń oqıwshılarına metodistler tárepinen ashıq sabaqlar ótip berildi.