“2025-jıl juwmaqları hám 2026-jıl wazıypaları” dodalandı

Búgin Qaraqalpaq mámleketlik universitetiniń májilisler zalında Qaraqalpaqstan Respublikası Mektepke shekemgi hám mektep bilimlendiriwi ministrliginiń “2025-jıl juwmaqları hámde 2026-jıldaǵı wazıypaları” atamasındaǵı keńeytilgen májilisi bolıp ótti.

Májiliste Qaraqalpaqstan Respublikası Ministrler Keńesiniń Jaslar siyasatı, sociallıq rawajlanıw hám ruwxıy-aǵartıwshılıq isleri boyınsha sekretariatınıń baslıǵı Bekbay Kalimbetov, Qaraqalpaqstan Respublikası Mektepke shekemgi hám mektep bilimlendiriw ministri Gulistan Kojabaeva, ministrdiń orınbasarları hám respublikamız boyınsha barlıq mektepke shekemgi bilimlendiriw shólkemleri hám ulıwma bilim beriw mektepleriniń basshıları qatnastı.

Ilaj aldınan 2025-jılı bilimlendiriw tarawında ámelge asırılǵan jumıslar sáwlelendirilgen videorolik kórsetildi. Bunnan soń Bekbay Kalimbetov bilimlendiriw sistemasında alıp barılıp atırǵan reformalarǵa unamlı baha berdi. Ministr Gulistan Kojabaeva bolsa 2025-jılı erisilgen jetiskenlikler, bar kemshilikler hám 2026-jıl ushın belgilengen tiykarǵı wazıypalar haqqında hár tárepleme maǵlıwmat berdi.

Májilis sheńberinde ministrliktiń baslaması menen birinshi márte engizilgen “Aǵla mektep-2025” joybarınıń juwmaqları járiyalanıp, jeńimpazlar sıylıqlandı.

️Jeńimpaz mektepler:

1-topar – Nókis qalası 46-sanlı mektep.
2-topar – Qońırat rayonı 47-sanlı mektep.
3-topar – Kegeyli rayonı 55-sanlı mektep.
4-topar – Shomanay rayonı 33-sanlı mektep.

Jeńimpazlarǵa ministrliktiń “Húrmet jarlıǵı,” statuetkası hám “Shet elge sayaxat” vaucherleri tapsırıldı.

Sonday-aq, joybarda belsene qatnasqan 9 mektep direktorı hám jıl dawamında joqarı nátiyjelerge erisken mektepke shekemgi bilimlendiriw shólkemleriniń basshıları ministrliktiń “Húrmet jarlıǵı” menen sıylıqlandı.

Ilaj mádeniyat xızmetkerleri tárepinen tayarlanǵan koncert baǵdarlaması menen dawam etti.