Ózbekstan Respublikası Prezidentiniń 2026-jıl 5-fevraldaǵı “Mektepke shekemgi bilimlendiriw hám tárbiya sistemasın bunnan bılay da jetilistiriw ilajları haqqında”ǵı 19-sanlı Pármanında belgilengen wazıypalardıń orınlanıwın támiyinlew, sonday-aq, mektepke shekemgi bilimlendiriw sistemasında oyınǵa tiykarlanǵan zamanagóy qatnaslardı keńnen engiziw maqsetinde “Bala, oyın hám pedagog” joybarı izbe-iz ámelge asırılmaqta.

Usı joybar sheńberinde búgin Nókis qalasındaǵı 53-sanlı mektepke shekemgi bilimlendiriw shólkeminde “Oyınǵa baǵdarlanǵan tálim-tárbiya” atamasında Respublikalıq ámeliy seminar shólkemlestirildi.

Seminarda mektepke shekemgi bilimlendiriw processine oyınǵa tiykarlanǵan metodikalardı nátiyjeli engiziw, pedagoglardıń kásiplik kompetenciyaların arttırıw hám balalardıń dóretiwshilik hám intellektuallıq potencialın rawajlandırıw máseleleri dodalandı.

Ilajda Tashkent qalası Mektepke shekemgi bilimlendiriw shólkemlerin muwapıqlastırıw basqarmasınıń baslıǵı Jamila Djamilova, Yunusabad rayonı 53-sanlı mektepke shekemgi bilimlendiriw shólkeminen Ruxsora Ibragimova, Sevara Ibragimova, Hilola Subxanova, Yangihayot rayonı 51-sanlı mektepke shekemgi bilimlendiriw shólkeminen Nodira Muminova, Ozodaxon Alimardonova, Dildora Yuldasheva hám Qaraqalpaqstan Respublikası Mektepke shekemgi hám mektep bilimlendiriwi ministrliginiń taraw wákilleri qatnastı.

Ámeliy seminar dawamında aldıńǵı tájiriybeler kórsetilip, oyın arqalı bilimlendiriw nátiyjeliligin arttırıwǵa qaratılǵan innovaciyalıq kózqaraslar usınıldı. Ilaj qatnasıwshıları óz-ara tájiriybe almasıp, keleshekte bul baǵdardaǵı jumıslardı bunnan bılay da jetilistiriw boyınsha pikir-usınıslar bildirdi.

Bul seminar mektepke shekemgi bilimlendiriw sistemasında sapa jaǵınan jańa basqıshtı baslap beriwge xızmet etetuǵın áhmiyetli ámeliy maydan boldı.

Ilaj dawam etedi.