Nókiste ıqlım bilimlendiriwine baǵıshlanǵan áhmiyetli seminar bolıp ótti BMSh Rawajlanıw baǵdarlaması, Education Above All fondı, Zamin xalıqaralıq jámiyetlik fondı hám Ózbekstan Respublikası Mektepke shekemgi hám mektep bilimlendiriwi ministrligi menen birgelikte búgin Nókis qalasındaǵı 55-sanlı ulıwma orta bilim beriw mektebinde “Ózbekstanda ıqlım bilimlendiriwi arqalı jaslardıń jetekshilik qábiletlerin kúsheytiw hám rawajlandırıw” atamasındaǵı birgeliktegi joybar sheńberinde mazmunlı seminar shólkemlestirildi. Ilajda Qaraqalpaqstan Respublikası Mektepke shekemgi hám mektep bilimlendiriwi ministriniń birinshi orınbasarı Aybek Dauletbaev, BMSh Rawajlanıw baǵdarlamasınıń Ózbekstandaǵı joybar orınlawshısı Ozod Haydarov hám joybar menedjeri Laziz Khujaqulov, muǵallimler hám oqıwshı-jaslar qatnastı. Seminardıń tiykarǵı maqseti – jaslardıń sanasında ekologiyalıq mádeniyattı qáliplestiriw, olardıń ıqlım ózgeriwi boyınsha bilim hám kónlikpelerin arttırıw jáne “jasıl” pikirlewdi keńnen úgit-násiyatlawdan ibarat boldı. Sonday-aq, oqıtıwshılarǵa zamanagóy kózqaraslar tiykarında klimat bilimlendiriwin sabaq processlerine nátiyjeli integraciyalaw boyınsha ámeliy usınıslar berildi. Joybar sheńberinde ulıwma bilim beriw mekteplerinde tábiyiy hám ámeliy pánlerge ıqlım ózgeriwi boyınsha bilimlendiriwdi engiziw, 2 520 trener hám 50 mıń muǵallimniń mamanlıǵın arttırıw rejelestirilgen. Sonıń menen birge, joqarı klass oqıwshılarınan jámi 1,3 million jastıń potencialın ıqlım bilimlendiriwi hám “jasıl” kónlikpeler arqalı rawajlandırıw názerde tutılǵan. Bul baslama mámleketimizde turaqlı rawajlanıwdı támiyinlew, jas áwladtı qorshaǵan ortalıqqa juwapkershilikli qatnasta bolıwǵa shaqırıw hám Ózbekstannıń jáne de jasıl keleshegin qurıwǵa xızmet etedi. 
