Pedagoglar jámáátleri arasında “Oyınǵa tiykarlanǵan bilimlendiriw, pedagogikalıq innovaciyalar hám didaktikalıq oyınlar” festivalı Beruniy rayonında tájiriybe-sınaw túrinde ótkerildi
Bul festivalǵa Qaraqalpaqstan Respublikası mektepke shekemgi hám mektep bilimlendiriw ministrligi bólim baslıǵı Z.Erejepova, Ájiniyaz atındaǵı Nókis mámleketlik pedagogikalıq institutınıń Pedagogika ilimleri boyınsha filosofiya doktorı docent D.Gayipov, Qaraqalpaqstan Respublikası pedagogikalıq sheberlik orayı metodikalıq xızmet kórsetiw bólimi mektepke shekemgi bilimlendiriw metodisti A.Otarbaev, ministrliktiń juwapker xızmetkerleri, sonday-aq, barlıq rayon (qala)lıq mektepke shekemgi bilimlendiriw shólkemlerinen direktor orınbasarı hám eń tájriybeli tárbiyashılar qatnastı.
Festivaldıń tiykarǵı maqseti:
- Festivaldıń tiykarǵı maqseti mektepke shekemgi bilimlendiriw shólkemlerinde oyınǵa tiykarlanǵan tálim metodikasın keńnen engiziw, pedagoglardıń kásiplik kompetensiyası hám dóretiwshilik potencialın rawajlandırıw jáne tálim-tárbiya procesine innovaciyalıq didaktikalıq oyınlardı engiziwdi xoshametlewden ibarat.
Festivaldıń tiykarǵı wazıypaları tómendegilerden ibarat:
mektepke shekemgi jastaǵı balalardıń biliw iskerligi, dóretiwshiligi, erkin pikirlewin rawajlandırıwǵa xızmet etetuǵın didaktikalıq oyınlar jaratıwdı xoshametlew;
mektepke shekemgi bilimlendiriw shólkemlerinde rawajlandırıwshı tálim ortalıǵın oyınǵa tiykarlanǵan tálim metodikası tiykarında bayıtıw;
pedagoglardıń didaktikalıq oyınlardı jaratıw, modellestiriw hám ámeliyatta qollanıw boyınsha dóretiwshilik jumısın qollap-quwatlaw;
festival nátiyjelerine bola eń jaqsı didaktikalıq oyınlardı anıqlaw hám olardı mektepke shekemgi bilimlendiriw shólkemlerinde en jaydırıw;
aldınǵı pedagogikalıq tájiriybelerdi anıqlaw hám olardı keńnen en jaydırıw.
Festival qatnasıwshıları:
Festivalǵa Beruniy rayon aymaǵındaǵı mámleketlik mektepke shekemgi bilimlendiriw shólkemlerinde jumıs islep atırǵan pedagog xızmetkerlerden 5 adamnan ibarat dóretiwshilik topar formasında qatnastı.
Festival “Dóretiwshilik marafon” tárizinde ótkerilip, komandalar qısqa waqıt ishinde oyınǵa tiykarlanǵan bilim beriw metodikası tiykarında jańa didaktikalıq oyın jaratdı.
Festival juwmaǵında sıylı orındı iyelegen mektepke shekemgi bilimlendiriw shólkeminiń pedagog jámáátleri (I-dárejeli diplom menen Beruniy rayonı 20-sanlı mektepke shekemgi bilimlendiriw shólkemi jámááti, II-dárejeli diplom menen Beruniy rayonı 51-sanlı mektepke shekemgi bilimlendiriw shólkemi jámááti, III-dárejeli diplom menen Beruniy rayonı 5-sanlı mektepke shekemgi bilimlendiriw shólkemi jámááti) ministrliktiń diplomı hám bahalı sawǵalar menen sıylıqlandı.
