Qaraqalpaqstan Respublikasında usı jıldıń may halatına jámi 1788 (sonnan, 502 mámleketlik, 25 menshik, 111 mámleketlik jeke menshik tiykarındaǵı hám 1150 shańaraqlıq) mektepke shekemgi bilimlendiriw shólkemleri jumıs alıp barmaqta.
Respublika boyınsha 3-7 jasqa shekemgi bolǵan balalar sanı 154 544 bala bolıp, olardan 129833 bala qamtıp alınǵan. Qamtıw dárejesi – 84,0 payız.
(2025-jılda 82,0 payız bolǵan bolsa, bul kórsetkish ótken jılǵıdan 2,0 payızǵa ósti).
Álbette, bunday kórsetkishke erisiwde:
– mámleketlik hám mámleketlik emes mektepke shekemgi bilimlendiriw shólkemleriniń jańadan qurılıwı, mektepke shekemgi bilimlendiriwdiń alternativ túrleriniń (májbúriy bir jıllıq biypul toparlar, qısqa múddetli toparlar, mobil toparlar, dáslepki rawajlanıw orayları) alıp kirilgenligi sebep boldı.
Atap aytqanda, Ózbekstan Respublikası Ministrler Kabinetiniń 2020-jıl 9-marttaǵı “Balalardı baslanǵısh tálimge májbúriy bir jıllıq tayarlaw sistemasın jáne de rawajlandırıw ilajları haqqında”ǵı 132-sanlı qararına tiykarlanıp 310 biypul májbúriy mektepke tayarlaw toparları shólkemlestirilip, olarǵa jámi 6571 bala qamtıp alındı.
Sonday-aq, Ózbekstan Respublikası Ministrler Kabinetiniń 2021-jıl 3-avgusttaǵı “Mobil toparlar bazasında mektepke shekemgi bilimlendiriw xızmetlerin kórsetiw sistemasın jáne de rawajlandırıw is-ilajları haqqında”ǵı 494-sanlı qararına tiykarlanıp, 7 rayonda 15 orınnan mobil toparlar shólkemlestirilip, 7 dana úskenelengen avtobus penen támiyinlendi. Búgingi kúnde 400 den aslam 3 jastan 7 jasqa shekemgi balalar biypul tálim almaqta.
Sonday-aq, 2025-jıl iyul ayında 485 mámleketlik mektepke shekemgi bilimlendiriw shólkemlerine hám 3 “Dáslepki rawajlanıw orayları”na 561 dana planshet jetkerip berildi.
2025-jıl sentyabr ayında 8 rayondaǵı mámleketlik mektepke shekemgi bilimlendiriw shólkemleriniӊ tárbiyashıları hám tárbiyalanıwshıları ushın jámi 110 832 dana (108 824 dana tárbiyalanıwshılarǵa, 2008 dana tárbiyashılarǵa) matematika shınıǵıw dápteri hámde metodikalıq qollanbalar tarqatıldı.
Ózbekstan Respublikası Prezidentiniń “Kámbaǵallıqtan abadanlıqqa qaray” baǵdarlamasın ámelge asırıw boyınsha dáslepki ilajlar haqqında”ǵı 2024-jıl 23-sentyabrdegi PQ-330-sanlı qararınıń orınlanıwın támiyinlew maqsetinde “Dáslepki rawajlanıw orayları”nıń jumısın basqıshpa-basqısh jolǵa qoyıw belgilendi.
