Ájiniyaz atındaǵı Nókis mámleketlik pedagogikalıq institutında Mektepke shekemgi hám baslawısh bilimlendiriw fakulteti Mektepke shekemgi tárbiya hám defektologiya kafedrasınıń arnawlı pedagogika hám logopediya baǵdarı pitkeriwshileriniń qatnasıwında “Inklyuziv bilimlendiriwdiń áhmiyeti hám pitkeriwshilerdiń bántligin támiyinlew” atamasında ushırasıw shólkemlestirildi.
Ushırasıwdıń tiykarǵı maqseti – inklyuziv bilimlendiriwdiń mazmun-mánisin keńnen úgit-násiyatlaw, arnawlı pedagoglarǵa bolǵan real zárúrlik haqqında pitkeriwshilerdi xabardar etiw, pitkeriwshilerdiń bántligin támiyinlew hám olardı bilimlendiriw mákemelerindegi bar imkaniyatlar menen tanıstırıwdan ibarat.
Ilajda Qaraqalpaqstan Respublikası Mektepke shekemgi hám mektep bilimlendiriwi ministrliginiń juwaplı qánigesi M.Omirzaqova, Xorezm wálayatı Mektepke shekemgi hám mektep bilimlendiriw basqarmasınıń juwaplı qánigesi M.Xodjiev, instituttıń Mektepke shekemgi tárbiya hám defektologiya kafedrası baslıǵı J.Bekmanova qatnasıp, pitkeriwshilerge inklyuziv bilimlendiriw sistemasında jumıs alıp barıw, kásiplik rawajlanıw hám jumısqa jaylasıw processleri boyınsha áhmiyetli usınıslar hám zárúr maǵlıwmatlardı berdi.
Ushırasıw dawamında inklyuziv klasslar jumısı jolǵa qoyılǵan ulıwma orta bilim beriw mektepleriniń direktorları qatnastı. Olar tárepinen arnawlı pedagog lawazımları ushın bar bolǵan bos jumıs orınları (vakantsiyalar) haqqında maǵlıwmat berilip, pitkeriwshilerge jumısqa jaylasıw imkaniyatları usınıs etildi.
Maǵlıwmat ushın:
Ilajda Ájiniyaz atındaǵı Nókis mámleketlik pedagogikalıq institutınıń 175 pitkeriwshisi (sonnan 40 pitkeriwshi Xorezm wálayatınan) qatnastı.
