Qaraqalpaqstan Respublikası, Tórtkúl rayonındaǵı 77 hám 45-sanlı ulıwma bilim beriw mektepleri direktorlıǵı ushın ótkerilgen tańlawlarǵa baylanıslı sociallıq tarmaqlar arqalı tarqalǵan xabarlar Ózbekstan Respublikası Mektepke shekemgi hám mektep bilimlendiriwi ministrligi tárepinen úyrenildi.
Úyreniw processinde Tórtkúl rayonındaǵı 77-sanlı mektep direktorlıǵı lawazımına ótkerilgen tańlaw processinde dámegóylik, tanıs-bilislik hám nızam buzılıw jaǵdayları júz bergeni haqqındaǵı xabarlar óz tastıyıǵın tappadı.
Sonday-aq, usı lawazımǵa talaban sıpatında kórsetilgen — Tórtkúl rayonındaǵı 63-sanlı mektep direktorınıń orınbasarı A.E. tárepinen tańlaw processlerinde dámegóylik yamasa basqa da korrupciyalıq jaǵdaylarǵa dus kelmegenligi atap ótildi.
Tórtkúl rayonındaǵı 45-sanlı mektep direktorlıǵı ushın arzası qabıl etilgen talabanlardıń hújjetleri házirgi waqıtta belgilengen tártipte úyrenilip atırǵanlıǵın málim etemiz. Usı talabanlardıń qatnasıwında ótkeriletuǵın sáwbetlesiw sınaq processleriniń waqtı hám basqa da maǵlıwmatlar haqqında qatnasıwshılar xabardar etiledi.
Maǵlıwmat ushın: ámeldegi tártipke bola, ulıwma bilim beriw mektepleriniń vakant direktor lawazımlarına talabanlar belgilengen mamanlıq talaplarına juwap beretuǵın jáne menejerlik sertifikatına iye bolǵan talabanlardıń manager.uzedu.uz portalına jibergen arzaları arqalı tańlap alınadı.
Bunnan soń aymaqlıq Direktorlar keńesi tárepinen talabanlardıń qatnasıwında sáwbet ótkeriledi hám sáwbet juwmaqları boyınsha Direktorlar keńesiniń usınısı tiykarında eń jaqsı dep tabılǵan talaban mektep direktorlıǵı lawazımına jumısqa qabıl etiledi.
QR Mektepke shekemgi hám mektep bilimlendiriwi ministrliginiń Málimleme xızmeti
