Qaraqalpaqstan Respublikası Mektepke shekemgi hám mektep bilimlendiriwi ministrligi sociallıq tarmaqlarda tarqalǵan, ministrlik basshısı lawazımı “vakant” jaǵdayında kórsetilgeni haqqındaǵı xabarlar boyınsha tómendegilerdi málim etedi.

Sociallıq tarmaqlarda keltirilgen maǵlıwmatlar ministrliktiń aldınǵı, házirgi waqıtta jumıs alıp barmay atırǵan veb-saytında jaylastırılǵan maǵlıwmatlarǵa tiykarlanǵan. Bul veb-sayttaǵı maǵlıwmatlardıń óz waqtında jańalanbaǵanı búgingi kúnde ministrliktiń ámeldegi málimleme resurslarınıń jumısın sáwlelendirmeydi.

Házirgi kúnde Qaraqalpaqstan Respublikası Mektepke shekemgi hám mektep bilimlendiriwi ministrliginiń ámeldegi rásmiy veb-saytında https://kkbilim.uz/ tarawǵa baylanıslı barlıq áhmiyetli maǵlıwmatlar, sonıń ishinde, bos jumıs orınları (vakanciyalar), tańlawlar, jańalıqlar hám basqa da rásmiy xabarlar turaqlı túrde jarıtıp barılmaqta.

Sonday-aq, ministrlik sistemasındaǵı basshı lawazımlarına baylanıslı rásmiy maǵlıwmatlar da belgilengen tártipte járiyalanıp kelinbekte. Qaraqalpaqstan Respublikası Mektepke shekemgi hám mektep bilimlendiriwi ministri lawazımı ámelde vakant emes bolıp, bul lawazımǵa basshı tayınlanǵan hám óziniń xızmet wazıypaların atqarıp kelmekte.

Jámiyetshilikti mámleketlik uyımlardıń jumısına baylanıslı maǵlıwmatlardı tarqatıwda tek ǵana rásmiy hám isenimli dáreklerge súyeniwge shaqıramız. Nadurıs maǵlıwmatlardıń tarqalıwı xalıq arasında tiykarsız túsinbewshiliklerdi keltirip shıǵarıwı múmkin.

❗️Esletpe:
Ministrliktiń rásmiy Telegram kanalında járiyalanıp atırǵan hár bir post astında ministrliktiń rásmiy veb-saytı hám sociallıq tarmaqlardaǵı betleriniń siltemeleri turaqlı túrde kórsetip barıladı.

QR Mektepke shekemgi hám mektep bilimlendiriwi ministrliginiń Málimleme xızmeti