Usı jıldıń 13-avgust kúni Qaraqalpaqstan Respublikası Mektepke shekemgi hám mektep bilimlendiriwi ministrliginde byudjet mákemelerinde jıllıq hám shereklik esabatlardı tayarlaw tártiplerindegi ózgerisler, mámleketlik satıp alıwlardı ámelge asırıw jaǵdayı hám bilimlendiriw tarawında korrupciyaǵa qarsı gúresiw baǵdarında alıp barılıp atırǵan jumıslar boyınsha seminar shólkemlestirildi.
Onda Ózbekstan Respublikası Sanaat kooperaciyası hám mámleketlik satıp alıwlar agentliginiń Qaraqalpaqstan Respublikası joybarlastırıw ofisi, Ózbekstan tovar-shiyki zat birjasınıń Qaraqalpaqstan filialı, Ekonomika hám qarjı ministrligi jáne ministrliktiń tiyisli bólim hám sektorlarınıń juwapker wákilleri qatnastı.
Mámleketlik satıp alıwlar tallandı
➖ Seminar dawamında 2026-jıldıń birinshi yarım jıllıǵında Qaraqalpaqstan Respublikası Mektepke shekemgi hám mektep bilimlendiriwi sistemasındaǵı byudjet buyırtpashıları tárepinen ámelge asırılǵan mámleketlik satıp alıwlar tallandı.
➖Atap aytqanda, jetkerip beriwshiler sheńberin keńeytiw, salamat báseki ortalıǵın támiyinlew, ayırım jetkerip beriwshiler menen qayta shártnamalar dúziliw sebeplerin úyreniw hám mámleketlik satıp alıwlardı imkaniyatı bolǵanınsha báseki tiykarında shólkemlestiriw máselelerine ayrıqsha itibar qaratıldı.
➖ Sonday-aq, tikkeley satıp alıwlardıń úlesi joqarı bolǵan aymaqlıq bólimlerdiń jumısın sın kózqarastan tallaw, bunday satıp alıwlardıń huqıqıy tiykarların úyreniw hám básekili satıp alıw usıllarınan paydalanıw dárejesin arttırıw boyınsha usınıslar berildi.
Satıp alıwlardı durıs rejelestiriw – áhmiyetli wazıypa
➖ Biykar etilgen shártnamalar, ásirese, birdey jetkerip beriwshiler menen qayta-qayta shártnama dúzilip, keyin ala biykar etilgen jaǵdaylardıń sebeplerin hár bir buyırtpashı kesiminde úyreniw zárúr ekenligi atap ótildi.
➖ Sonıń menen birge, bir túrdegi tovar, jumıs hám xızmetlerge bolǵan jıllıq hám kvartallıq talaplardı aldınnan qáliplestiriw, satıp alıwlardı ulıwmalastırılǵan túrde rejelestiriw hám bir túrdegi satıp alıwlardı qısqa waqıt aralıǵında kóplegen ayrıqsha shártnamalarǵa ajıratıp rásmiylestiriw jaǵdaylarınıń aldın alıw boyınsha pikir-usınıslar bildirildi.
Báseki hám ishki qadaǵalawdı kúsheytiw
➖ Ózbekstan tovar-shiyki zat birjasınıń Qaraqalpaqstan filialı qánigesi tárepinen arnawlı bir jetkerip beriwshiler menen kóp márte shártnama dúziw jaǵdayların tallaw, báseki ortalıǵın keńeytiw hám jergilikli jetkerip beriwshilerdi satıp alıw processlerine keńirek tartıw boyınsha usınıslar bildirildi.
➖ Sonday-aq, mámleketlik satıp alıwlarǵa juwapker xızmetkerlerdiń mamanlıǵın arttırıw, satıp alıwlardı rejelestiriwden baslap shártnamanıń orınlanıwına shekemgi processlerde ishki qadaǵalaw mexanizmlerin kúsheytiw áhmiyetli ekenligi atap ótildi.
Korrupciyaǵa qarsı gúresiw – turaqlı itibarda
➖ Seminarda bilimlendiriw tarawında sońǵı 6 ay dawamında ámelge asırılǵan jumıslar, ótkerilgen monitoringlerdiń nátiyjeleri hám anıqlanǵan qáte-kemshilikler de sın kózqarastan dodalandı.
➖ Sonday-aq, ámeldegi nızamshılıqqa kirgizilip atırǵan ózgerisler hám qosımshalar, korrupciyaǵa baylanıslı jınayatlar ushın belgilengen juwapkershilik ilajları, huqıqıy nigilizm hám onıń aqıbetleri boyınsha túsinikler berildi.
➖ Bilimlendiriw sistemasında mámleketlik byudjet qarjılarınan maqsetli hám nátiyjeli paydalanıw, mápler soqlıǵısıwınıń aldın alıw, korrupciyalıq jaǵdaylarǵa jol qoymaw hám nızamshılıq talaplarına qatań ámel etiw máselelerine ayrıqsha itibar berildi.
Seminarda bildirilgen usınıslar, mámleketlik satıp alıwlarda ashıq-aydınlıq hám básekini támiyinlew jáne finanslıq tártipti jáne de bekkemlew boyınsha tiyisli ilajlardı ámelge asırıw belgilep alındı.
