Búgin, 8-sentyabr kúni Nókis qalasındaǵı 53-sanlı ulıwma orta bilim beriw mektebinde Qaraqalpaqstan Respublikasındaǵı mektepke shekemgi bilimlendiriw shólkemleri pedagogları ushın úsh kúnlik “Muvozanat” psixologiyalıq treningi óz jumısın basladı. Bul trening Ózbekstan Respublikası Mektepke shekemgi hám mektep bilimlendiriwi ministrligi tárepinen shólkemlestirilgen bolıp, onıń tiykarǵı maqseti – pedagog hám mektepke shekemgi bilimlendiriw shólkemleri xızmetkerleriniń ruwxıy-emocional jaǵdayın qollap-quwatlaw, ishki turaqlılıqtı saqlaw hám kásiplik salamatlıǵın bekkemlewden ibarat.

Trening dawamında qatnasıwshılar: – emocional salamatlıqtı tiklew hám qollap-quwatlaw; – stressti basqarıw hám ózin-ózi qadaǵalaw; – emocional intellektti rawajlandırıw; – kásiplik motivaciyanı bekkemlew; – balalar menen islesiwde salamat emocional ortalıq jaratıw; – bilimlendiriw ortalıǵında emocionallıq hám fizikalıq zorlıqtıń aldın alıw boyınsha ámeliy kónlikpelerge iye boladı.

Úsh kún dawamında qánigeler zamanagóy psixologiyalıq metodikalardı ózlestirip, interaktiv shınıǵıwlarda qatnasadı, ámeliy usıllardı qollanıp kóredi hám óz-ara tájiriybe almasadı. Treningtiń tiykarǵı itibarı – pedagogtıń ruwxıy abadanlıǵı arqalı balalar ushın salamat hám qáwipsiz emocionallıq ortalıqtı qáliplestiriwge qaratılǵan. Trening sabaqları 10-sentyabrge shekem dawam etedi.