Nókis mámleketlik pedagogikalıq institutında “El-yurt umidi” qorınıń wákilleri hám jaslar qatnasıwında ashıq sáwbet bolıp ótti
Bul ilaj mámleketimiz aymaqlarında xalıqaralıq bilimlendiriw baǵdarlamaların ǵalaba en jaydırıw, qábiletli jaslardı globallıq akademiyalıq jámiyetshilikke tartıw hám Ózbekstannıń insan kapitalın bekkemlewge qaratılǵan keń kólemli “El-yurt umidi” qorı kúnleri sheńberinde shólkemlestirildi.
Ilajda Qaraqalpaqstan Respublikası Ministrler Keńesi sekretariatınıń baslıǵı Bekbay Kalimbetov, “El-yurt umidi” qorı atqarıwshı direktorınıń orınbasarı Davron Abdurashidov, qor juwapker xızmetkerleri Qahraman Bektimrov, Abduaziz Kenjabaev, Rita Aytmuratova, Qaraqalpaqstan Respublikası Mektepke shekemgi hám mektep bilimlendiriwi ministriniń birinshi orınbasarı Aybek Dauletbaev qatnasıp, jaslar menen ashıq pikirlesti.
Ushırasıwda shet tillerin jaqsı ózlestirgen, B2 hám C1 dárejedegi xalıqaralıq sertifikatlarǵa iye ulıwma bilim beriw mektepleriniń oqıwshıları, joqarı bilimlendiriw mákemeleriniń studentleri, jaslar jetekshileri hám jas mámleketlik xızmetkerler qatnastı.
Sáwbet dawamında:
➖ “El-yurt umidi” qorınıń jumısı hám sırt elde bilim alıw imkaniyatları;
➖ dúnyanıń jetekshi universitetlerinde bilim alıw ushın bar baǵdarlama hám grantlar;
➖ ashıq stipendiya tańlawlarında qatnasıw tártibi hám talabanlarǵa qoyılatuǵın talaplar;
➖ stipendiatlarınıń sırt elde bilim alıwdı tamamlaǵannan soń Ózbekstanda múnásip jumıs penen támiyinleniwi, kásiplik hám lawazım basqıshlarında ósiwi hám Milliy kadrlar rezervine kirgiziliwi sıyaqlı máseleler boyınsha tolıq maǵlıwmatlar berildi.
Sonday-aq, rayon hám qalalarda shólkemlestiriletuǵın studiyalar arqalı ulıwma bilim beriw mektepleri hám texnikumlardıń oqıwshıları, sırt elde bilim alıw tilegindegi jaslar ushın onlayn ushırasıwlar da shólkemlestirildi.
Baslamanıń tiykarǵı maqseti – mámlekettiń barlıq aymaqlarındaǵı qábiletli jaslar, ásirese, shetki aymaqlarda jasaytuǵın hám sociallıq qorǵawǵa mútáj qatlam wákillerine dúnyanıń abıraylı universitetlerinde bilim alıw imkaniyatları haqqında keń málimleme beriwden ibarat.
