Qaraqalpaqstan Respublikası, Nókis qalasında “Mektepke shekemgi bilimlendiriw tiykarların bekkemlew: balalardıń dáslepki jasınan sawatlılıq, salamat turmıs tárizi kónlikpelerin qáliplestiriw hám shańaraqtı tartıwda kompetenciyalıq qatnastı engiziw” temasında ilimiy-ámeliy konferenciya shólkemlestirildi.
-Mehribanlıq Korpusınıń (Mercy Corps) Ózbekstandaǵı filialı, Mektepke shekemgi bilimlendiriw hám mektep bilimlendiriwi ministrligi jáne Sanitariyalıq-epidemiologiyalıq tınıshlıq hám jámietlik salamatlıq komiteti menen birgelikte ótkerilgen ilaj AQSh Awıl xojalıǵı ministrligi tárepinen qarjılandırılǵan “Balalar bilimlendiriwi hám awqatlanıwı ushın xalıqaralıq azıq-awqat baǵdarlaması” sheńberinde ótkerildi.
Onda Ózbekstan Respublikası Mektepke shekemgi hám mektep bilimlendiriwi ministrligi, Qaraqalpaqstan Respublikası Mektepke shekemgi hám mektep bilimlendiriwi ministrliginiń juwapkerleri, aymaqtaǵı mektepke shekemgi bilimlendiriw shólkemleriniń pedagog hám metodistleri qatnastı.
Ilajda shıǵıp sóylegen spikerler mektepke shekemgi bilimlendiriw shólkemlerinde erte sawatlılıqtı rawajlandırıw hám pedagoglardı tayarlawdıń aldınǵı xalıqaralıq tájiriybeleri haqqında óz pikir-usınısların bildirdi. Sonday-aq, mektepke shekemgi bilimlendiriwde este saqlawdı rawajlandırıw hám balalardıń sezilerli jáne sociallıq ósiwine járdemlesiw jolları hám basqa da áhmiyetli máseleler dodalandı.
Maǵlıwmat ushın: McGovern-Dole “Bilimlendiriw hám balalardıń awqatlanıwı” baǵdarlaması Ózbekstannıń awıllıq aymaqlarında balalardıń erte jastan bilim alıwın jaqsılawǵa qaratılǵan bes jıllıq baǵdarlama bolıp esaplanadı. Baǵdarlamanıń gózlengen maqseti mektepke shekemgi bilimlendiriw shólkemlerinde bilimlendiriw hám awqatlanıwdı qollap-quwatlawǵa itibar qaratqan halda, balalardıń rawajlanıwına bir pútin qatnastı jaratıwdan ibarat.
Ministrliktiń Málimleme xızmeti
