Búgin Qaraqalpaqstan Respublikası Mektepke shekemgi hám mektep bilimlendiriw ministrligi hám Respublikalıq “Bárkamal áwlad” balalar mektebi menen birgelikte “Áhmiyetli 90 kúnlik” jumıs rejesi sheńberinde ǵalaba xabar quralları wákilleri, jurnalistler hám blogerlerdiń qatnasıwında press-tur shólkemlestirildi.

Bul ilajdıń tiykarǵı maqseti – bilimlendiriw tarawında alıp barılıp atırǵan reformalar, atap aytqanda, balalar hám jaslar ushın jaratılıp atırǵan imkaniyatlar, sonday-aq, “Bárkamal áwlad” mektepleriniń jumısı hám olardaǵı aldınǵı tájiriybelerdi keń jámiyetshilikke jetkeriwden ibarat.

Ilaj dawamında ǴXQ wákillerine tarawda ámelge asırılıp atırǵan jumıslar, ámeldegi joybarlar, keleshektegi perspektivalı rejelerdiń mazmun-mánisi haqqında hár tárepleme maǵlıwmat berildi. Qatnasıwshılar mektep jumısı, bilimlendiriw baǵdarları, dógerekler, ustazlar jámááti hám oqıwshılardıń dóretiwshilik jumısları menen jaqınnan tanıstı.

Sonday-aq, press-tur dawamında jurnalist hám blogerler “Bárkamal áwlad” balalar mektebinde jaratılǵan zamanagóy sharayatlar – texnikalıq úskeneler, dógerek xanaları, kitapxana, sport hám mádeniyat maydanshaların kózden ótkerdi. Mektepte oqıwshılardıń hár tárepleme rawajlanıwı ushın jaratılǵan imkaniyatlar, innovaciyalıq qatnaslar hám dóretiwshilik ortalıq hámmede úlken tásir qaldırdı.