Beruniy rayonındaǵı ulıwma orta bilim beriw mekteplerinde bilimlendiriwdiń sapası hám mazmunı, pedagoglardıń potencialı, oqıw jılı juwmaǵı boyınsha mektep pitkeriwshileriniń joqarı bilimlendiriw mákemelerine oqıwǵa kiriwi hám qábiletli oqıwshılardıń tiykarǵı pán olimpiadalarındaǵı nátiyjeleri hám IT tarawında alıp barılıp atırǵan jumıslardıń nátiyjeliligin jáne de arttırıw maqsetinde Qaraqalpaqstan Respublikası Mektepke shekemgi hám mektep bilimlendiriw ministrligi hám Beruniy rayonı hákimliginiń 2025-jıl 28-oktyabrdegi “Beruniy rayonındaǵı ulıwma orta bilim beriw mekteplerinde bilimlendiriwdiń sapası hám mazmunın jáne de arttırıw ilajları haqqında”ǵı 35-sanlı, 2-sanlı qospa qararı qabıl etildi. Usı qarardıń orınlanıwı boyınsha Beruniy rayonı hákimi I.Xidirov hám QR Mektepke shekemgi hám mektep bilimlendiriw ministri G.Kojabaeva qatnasıwında májilis bolıp ótti. Usı qarar menen: Beruniy rayonındaǵı ulıwma orta bilim beriw mekteplerinde bilimlendiriwdiń sapasın hám mazmunın bunnan bılay da arttırıw boyınsha belgilengen wazıypalardıń óz waqtında hám nátiyjeli orınlanıwın qadaǵalap barıw, bilimlendiriw tarawındaǵı huqıqıy-normativlik hújjetlerge tiykarlanıp, Beruniy rayonındaǵı ulıwma orta bilim beriw mekteplerinde bilimlendiriwdiń sapasın hám mazmunın bunnan bılay da arttırıw boyınsha barlıq imkaniyatlardı jumsaw, hár sherektiń juwmaǵı boyınsha Beruniy rayonındaǵı ulıwma orta bilim beriw mektebi basshıları menen májilis ótkeriw hám hár bir bánttiń orınlanıwın dodalaw, ámelge asırılǵan jumıslar boyınsha Qaraqalpaqstan Respublikası Ministrler Keńesine tiykarlanǵan analitikalıq maǵlıwmatlardı kirgizip barıw boyınsha Respublikalıq jumısshı topar tastıyıqlandı. Sonıń menen birge, Beruniy rayonı ulıwma orta bilim beriw mekteplerinde bilimlendiriwdiń sapasın hám mazmunın bunnan bılay da arttırıw boyınsha ilajlar rejesi; Ulıwma orta bilim beriw mektepleriniń nátiyjelilik kórsetkishleri tastıyıqlandı. Sonday-aq, keyingi 3 jılǵa 11-klass pitkeriwshileriniń JOOna qamtıp alıw rejesin 29 payızǵa; Pedagoglardıń potencialı boyınsha joqarı kategoriyanı 14,1 payızǵa, birinshi kategoriyanı 24,6 payızǵa, ekinshi kategoriyanı 43,6 payızǵa arttırıwǵa; Ulıwma orta bilim beriw mektepleri muǵallimleriniń pánlerden alǵan xalıqaralıq hám milliy sertifikatlarınıń úlesin 20 payızǵa; Ulıwma orta bilim beriw mektepleri oqıwshılarınıń pánlerden alǵan xalıqaralıq hám milliy sertifikatlarınıń úlesin 10 payızǵa; Ulıwma orta bilim beriw mektepleri oqıwshılarınıń pán olimpiadalarındaǵı sıylıqlı Tiykarǵı pán olimpiadası (QR 3-basqıshı) 1-, 2-, 3-orınlardıń sanın 14 ke, Tiykarǵı pán olimpiadası (Respublikalıq 4-basqıshı) Sıylıqlı orınlardıń yamasa qatnasıwshılardıń sanın 4 ke, Xalıqaralıq pán olimpiadası Sıylıqlı orınlardıń yamasa qatnasıwshılardıń sanın 3 ke; Beruniy rayonınıń “Alǵla mektep” joybarında bilimlendiriw sapası baǵdarları boyınsha nátiyjelerin arttırıw boyınsha nátiyjelilik kórsetkishlerin Qaraqalpaqstan Respublikası boyınsha 5-orınǵa kóteriw rejelestirilgen. Bul birgeliktegi qararǵa tiykar etip alınǵan ámeliy jumıslar boyınsha áhmiyetli tapsırmalar berildi. 
