Nókis qalası hákimliginde Qaraqalpaqstan Respublikası Ministrler Keńesi Baslıǵı tárepinen tastıyıqlanǵan keste tiykarında sırt el grant qarjıların tartıw boyınsha orınlarda ámelge asırılıp atırǵan jumıslardı tallaw hám olardı sistemalı túrde shólkemlestiriw maqsetinde ámeliy járdem kórsetiw boyınsha seminar-trening bolıp ótti.

Ilaj aymaqta grant jumısın jáne de jedellestiriw, perspektivalı joybarlardı qollap-quwatlaw hám xalıqaralıq jáne jergilikli donor shólkemler menen birge islesiwdi bekkemlew maqsetinde shólkemlestirildi.

Seminarda qala hákiminiń orınbasarı J.Otejanov, Qaraqalpaqstan Respublikası Ministrler Keńesiniń Sırtqı biyǵárez járdem qarjıların (grantlar) tartıw hám donorlar menen islesiw bóliminiń bas qánigesi N.Abipov, bólim eksperti B.Sultamuratov, Qaraqalpaqstan Respublikası Mektepke shekemgi hám mektep bilimlendiriwi ministrliginiń juwaplı qánigesi A.Erejepovalar tárepinen qatnasıwshılarǵa grant joybarların islep shıǵıwdıń basqıshpa-basqısh mexanizmleri, joybar hújjetlerin durıs hám sistemalı júrgiziw tártibi, donor shólkemler menen nátiyjeli qarım-qatnas ornatıw hám birge islesiwdi jolǵa qoyıw boyınsha aldıńǵı ámeliy tájiriybeler haqqında tolıq maǵlıwmatlar berildi.

Seminar-treningte qatnasıwshılar óz joybarların usınıs etip, qánigeler menen tikkeley pikir alısıw hám másláhátlesiw imkaniyatına iye boldı. Bul seminar grant jumısın sistemalı jolǵa qoyıw, jańa baslamalardı hám xalıqaralıq birge islesiwdi keńeytiw jolında áhmiyetli qádem boldı.