Baqsha tárbiyalanıwshıların nızamsız tasıw jaǵdayı boyınsha rásmiy múnásibet.
Sociallıq tarmaqlarda mektepke shekemgi bilimlendiriw shólkemi tárbiyalanıwshıların jeńil avtomashinalarda (Damas) ózbasımshalıq penen tasıw jaǵdayları sáwlelengen video tarqaldı.
Bul video boyınsha Qaraqalpaqstan Respublikası Mektepke shekemgi hám mektep bilimlendiriw ministrligi tárepinen qadaǵalawǵa alınıp, úyreniw jumısları alıp barıldı.
Úyreniwler dawamında bul jaǵday Shımbay rayonında jaylasqan, jeke isbilermen tárepinen shólkemlestirilgen shańaraqlıq mektepke shekemgi bilimlendiriw shólkeminiń tárbiyalanıwshıları menen baylanıslı ekeniligi anıqlandı. Anıqlanǵan jaǵday boyınsha usı shólkemniń shólkemlestiriwshisinen túsinik xatı alındı. Sonday-aq, bunday jaǵdaylardıń aldın alıw maqsetinde isbilermenlerge eskertiwler berildi.
Bunnan tısqarı, rayonlıq mektepke shekemgi hám mektep bilimlendiriw bólimi hám rayonlıq Jol háreketi qáwipsizlik bólim qánigeleri menen birgelikte túsindiriw jumısları alıp barıldı. Transportta adam tasıw qaǵıydalarına ámel etpegen avtotransport basqarıwshılarına tiyisli qánigeler tárepinen belgilengen tártipte hákimshilik protokollar rásmiylestirilip, járiymalar qollanıldı.
Házirgi waqıtta unamsız jaǵdaylardıń aldın alıw maqsetinde Qaraqalpaqstan Respublikası Mektepke shekemgi hám mektep bilimlendiriw ministrligi hám Jol háreketi qáwipsizligi basqarması tárepinen barlıq aymaqlarda profilaktikalıq hám túsinik jumısları dawam ettirilmekte.
QR Mektepke shekemgi hám mektep bilimlendiriw ministrliginiń Málimleme xızmeti
