Ózbekstan Respublikası Ministrler Kabinetiniń arnawlı qararı tiykarında tastıyıqlanǵan “Bilimlendiriw dárejesi joqarı bolmaǵan mekteplerde bilim beriw ushın basqa aymaqlardan muǵallim-pedagoglardı tartıw tártibi haqqında”ǵı rejege muwapıq, hár jılı ulıwma bilim beriw mektepleriniń jumısı kompleksli túrde úyrenilip, olardıń bilimlendiriw sapası bahalanadı hám nátiyjeler tiykarında óz aldına dizim qáliplestiriledi.
2025-2026-oqıw jılında 24 ulıwma bilim beriw mektebi bilimlendiriw dárejesi joqarı bolmaǵan mákemeler dizimine kirgizilgen edi. Ámelge asırılǵan sistemalı ilajlar nátiyjesinde 2026-2027-oqıw jılında bul kórsetkish 20 ǵa azaydı. Bul bolsa alıp barılıp atırǵan jumıslar basqıshpa-basqısh unamlı nátiyje berip atırǵanın kórsetedi.
️Bul mekteplerde bilimlendiriwdiń sapasın arttırıw, bar mashqalalardı saplastırıw hám de olardı joqarı nátiyjeler qatarına alıp shıǵıw maqsetinde búgin ministrliktiń májilisler zalında áhmiyetli ushırasıw shólkemlestirildi.
️Ushırasıwda ministrdiń birinshi orınbasarı Aybek Dauletbaev, aymaqlıq juwapkerler hámde bilimlendiriw sapası tómen dep bahalanǵan mektepler direktorları qatnastı.
️Ushırasıw dawamında:
– mekteplerde bilimlendiriw sapasınıń tómenlewine sebep bolıp atırǵan faktorlar tereń tallandı;
– pedagog kadrlar potencialı, oqıw processiniń sapası hám basqarıw sistemasındaǵı kemshilikler dodalandı;
– basqa aymaqlardan maman oqıtıwshılardı tartıw, metodikalıq járdemdi kúsheytiw hám zamanagóy qatnaslardı engiziw boyınsha anıq wazıypalar belgilep alındı.
Sonday-aq, hár bir mektep kesiminde individual “jol kartaları”n islep shıǵıw, nátiyjelilikti turaqlı monitoring etiw hám juwapkershilikti kúsheytiw máselelerine ayrıqsha itibar qaratıldı.
Tiykarǵı maqset – hár bir aymaqta, hár bir mektepte sapalı hám teń bilimlendiriw ortalıǵın jaratıw, oqıwshılar ushın jáne de keń imkaniyatlar ashıw bolıp esaplanadı.
