Búgin, 6-mart kúni Nókis qalası Jas tamashagóyler teatrında «Jańa Ózbekstan» universitetiniń Sanetullaev Alisher Esbosinovich hám Rossiya Ilimler akademiyasınıń belgili professorı Belov Pavel Aleksandrovich, Qaraqalpaqstan Respublikasınıń ulıwma orta bilim beriw mektep oqıwshıları qatnasıwında «Sheberlik saatları» shólkemlestirildi. Ilajdı Qaraqalpaqstan Respublikası Mektepke shekemgi hám mektep bilimlendiriw ministrliginiń bólim baslıǵı M.Asemetdinov ashıp berdi hám alıp bardı. Dáslep, professor Belov Pavel Aleksandrovich óziniń ilimiy jumısı hám izertlewleri haqqında bayanat jasadı. Ol “Elektromagnit tolqınlardıń turmısta qollanılıwı” temasında prezentaciya islep, bul baǵdardaǵı eń sońǵı izertlewler hám innovaciyalar menen tanıstırdı. Atap aytqanda, sımsız quwatlaw úskenesiniń islew principi, onıń zamanagóy turmıstaǵı áhmiyeti hám perspektivaları haqqında tolıq túsinikler berdi. Bunnan soń, Sanetullaev Alisher Esbosinovich Jańa Ózbekstan universitetiniń jumısı, bilimlendiriw baǵdarlamaları hám xalıqaralıq birge islesiw baǵdarları haqqında prezentaciya menen shıǵıp sóyledi. Ol usı universitettiń ilimiy-izertlew baǵdarları, studentlerge jaratılǵan qolaylıqlar hám xalıqaralıq kólemdegi birge islesiw joybarlarına ayrıqsha itibar qarattı. Sonday-aq, Jańa Ózbekstan universitetinde fizika hám injenerlik baǵdarlarında ámelge asırılıp atırǵan innovaciyalıq joybarlar haqqında da maǵlıwmat berildi. Ilajda oqıwshılar ózlerin qızıqtırǵan sorawlarına juwaplar aldı. 
