Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen tastıyıqlanǵan “Qaraqalpaqstan Respublikasında kásiplik bilimlendiriw ustaları ushın kásiplik bilimlendiriwdi rawajlandırıw kúni”n ótkeriw grafigi tiykarında Tórtkúl rayonı 44-sanlı ulıwma orta bilim beriw mektebinde áhmiyetli Respublikalıq seminar sheńberinde ashıq sáwbet bolıp ótti.
Bul ilaj sheńberinde kásiplik bilimlendiriw ustaları ushın “Kásiplik bilimlendiriwdi rawajlandırıw,” sonday-aq, mektep ámeliyatshı psixologları ushın “Jas óspirimlerde maqset qoyıw, internetke qaramlıqqa qarsı psixologiyalıq immunitet, jeke rawajlanıw kónlikpelerin qáliplestiriw” temalarında ashıq sáwbet hám tájiriybe almasıwlar shólkemlestirildi.
Ilajdıń tiykarǵı maqseti – óz-ara birge islesiwde tájiriybe almasıw hám innovaciyalıq kózqaraslardı ámeliyatqa engiziwden ibarat.
Seminar dawamında tigiwshilik, IT, ustaxana sıyaqlı baǵdarlarda jumıs alıp barıp atırǵan kásiplik bilimlendiriw ustaları óz tájiriybelerin usınıs etip, ámeliy sabaqlar arqalı kásip sırların tereńirek úyretti. Óz gezeginde, mektep ámeliyatshı psixologları jas áwlad penen islesiwdegi nátiyjeli usıllar, zamanagóy psixologiyalıq qatnaslar menen pikirlesip, jas óspirimlerdiń maqsetke umtılıwı, sanlı texnologiyalardan sanalı paydalanıwı hám jeke rawajlanıwı jolında qanday usıllar qollanılıwı múmkin ekenligi boyınsha pikir alıstı.
Ashıq sáwbet – ámeliy tájiriybelerdi almasıw maydanına aylandı. Ilaj sheńberinde shólkemlestirilgen ashıq sáwbet qatnasıwshılar ushın óz tarawında tereń tallawlar alıp barıw, áhmiyetli máseleler boyınsha óz-ara pikirlesiw hám innovaciyalıq kózqaraslardı dodalaw imkaniyatın berdi. Seminar qatnasıwshıları tárepinen alǵa qoyılǵan pikirler, usınıslar, kózqaraslar kásiplik bilimlendiriw sistemasın jetilistiriw, mektep psixologiyalıq xızmetleriniń sapasın arttırıwǵa xızmet etedi.
Seminarǵa qatnasqan ustazlar óz bilim hám kónlikpelerin tek oqıwshılarǵa emes, al óz tarawınıń basqa qánigelerine de jetkeriw, óz-ara úyreniw arqalı jáne de nátiyjeli jumıs alıp barıw imkaniyatına iye boldı. Bul bolsa, óz gezeginde, aymaqlıq hám respublikalıq kólemde kásiplik potencialdı arttırıw, bilimlendiriwdiń sapasın jańa basqıshqa alıp shıǵıwda áhmiyetli faktor esaplanadı.
“Professional bilimlendiriwdi rawajlandırıw” kúniniń mazmunı bay hám maqsetli shólkemlestiriliwi bilimlendiriw sistemasında alıp barılıp atırǵan reformalardıń ámeliy kórinisi bolıp esaplanadı. Bunday ilajlar arqalı ustazlar óz-ara pikir alısıp, zamanagóy kózqaraslardı úyrengen halda, oqıwshılardıń bilim hám kónlikpelerin zaman talapları tiykarında qáliplestiriwge tiykar jaratadı.
