2025-jıl 15-may kúni Prezidentimizdiń basshılıǵında mektep bilimlendiriw sistemasındaǵı reformalarǵa baǵıshlanǵan videoselektor májilisinde mámleket basshısı tárepinen jaslardıń bos waqtın mazmunlı shólkemlestiriwge qaratılǵan “Áhmiyetli 90 kúnlik” baǵdarlaması járiyalandı.

Bul baǵdarlamalar jaslarda sociallıq belsendilikti arttırıw, olardıń bilim hám kónlikpelerin rawajlandırıw, mádeniy-ruwxıy dárejesin arttırıwǵa xızmet etedi.

Usı wazıypalardıń orınlanıwın támiyinlew maqsetinde Nókis qalasındaǵı 3-sanlı ulıwma orta bilim beriw mektebinde “Áhmiyetli 90 kúnlik” baǵdarlamasın ámelge asırıwǵa qaratılǵan kórgizbeli seminar shólkemlestirildi.

Ilajǵa Qaraqalpaqstan Respublikası Mektepke shekemgi hám mektep bilimlendiriwi ministriniń orınbasarı K.Ismailov, Qaraqalpaqstan Respublikası Prokurorınıń aǵa járdemshisi B.Agitaev hám Nókis, Kegeyli, Xojeli hám Taqıyatas rayonlarınan pedagog xızmetkerler qatnastı.

Ilajda 2024-2025-oqıw jılı dawamında usı mektepte jumıs alıp barǵan “Shet tilin úyreniw” dógeregi, “Tigiwshilik,” “Muzika” dóretiwshilik dógerekleri, “Shaxmat,” “Shashka,” “Futbol,” “Voleybol” hám “Gúres” sport sekciyaları jaz máwsiminde de jumısı dawam ettiriletuǵını jıynalǵanlarǵa túsindirildi.

Sonday-aq, mektep kitapxanası da jaz máwsimi dawamında oqıwshılarǵa xızmet etiwi hám oqıwshılardıń jazıwshı, shayırlar menen ushırasıwları, dógerek sáwbetleri ótkeriliwi rejelestirilgen.

Kórgizbeli seminar dawamında Qaraqalpaqstan Respublikası Prokuraturası tárepinen mektep oqıwshılarınıń jazǵı dem alıs dáwirin mazmunlı hám nátiyjeli shólkemlestiriw, balalardı dógereklerge qamtıp alıwdı keńeytiw, mektep oqıwshılarınıń bántligin támiyinlew hám olardıń sociallıq belsendiligin arttırıwǵa qaratılǵan ilajlardı ámelge asırıwda óz járdemlerin kórsetetuǵınlıǵın bildirip ótti.