Búgin Ministrler Keńesiniń Baslıǵı F.Ermanov hám Joqarǵı Keńes Komitet baslıǵı M.Atamuratovtıń basshılıǵında 2025-2026-oqıw jılına tayarlıq máselelerine baǵıshlanǵan sın kózqarastaǵı hám analitikalıq ushırasıw bolıp ótti.

Ushırasıwda respublikamız boyınsha barlıq rayonlıq mektepke shekemgi hám mektep bilimlendiriw bólimleriniń baslıqları, ulıwma orta bilim beriw mektepleriniń direktorları hám juwapker basshı xızmetkerler qatnastı.

Ushırasıwda jańa oqıw jılına nátiyjeli tayarlıq kóriw, bilimlendiriw mákemelerinde bar sharayatlardı jetilistiriw, oqıw-tárbiya processin joqarı dárejede shólkemlestiriw sıyaqlı máseleler hár tárepleme dodalandı. Sonıń menen birge, bilimlendiriwdiń sapasın arttırıw, muǵallimlerdiń mamanlıǵın turaqlı túrde arttırıp barıw, zamanagóy bilimlendiriw texnologiyaların engiziw hám oqıwshılar ushın múnásip bilimlendiriw ortalıǵın jaratıw boyınsha wazıypalar belgilep alındı.

Ushırasıw sheńberinde bıyılǵı pitkeriwshi oqıwshılardıń joqarı bilimlendiriw mákemelerine kiriw kórsetkishleri de talıqlandı. Ayırım rayonlar kesiminde nátiyjeler óz-ara salıstırılıp, joqarı kórsetkishlerge erisken aymaqlardıń tájiriybesi mısal sıpatında keltirildi. Sonday-aq, tómen kórsetkish atap ótilgen aymaqlar boyınsha sebepler ashıq dodalanıp, olardı saplastırıw ushın ámeliy ilajlar belgilendi.

Sonday-aq, infrastruktura, oqıw quralları menen támiyinlew, pedagog kadrlardıń jetispewshiligi hám basqa da áhmiyetli máseleler de sın kózqarastan tallandı. Mashqalalardı sheshiw boyınsha anıq wazıypalar hám múddetler belgilendi.

Ushırasıw juwmaǵında juwapker basshılarǵa jańa oqıw jılın múnásip kútip alıw, bilimlendiriw sistemasında sapa ózgerislerin támiyinlew hám belgilengen wazıypalardı óz waqtında orınlaw boyınsha tapsırmalar berildi.