Social tarmaqlar arqalı Nókis qalası 12-sanlı ulıwma orta bilim beriw mektep direktorınıń jumıs barısı haqqında sın material tarqaldı.

Tarqalǵan material boyınsha Qaraqalpaqstan Respublikası Mektepke shekemgi hám mektep bilimlendiriw ministrligi tárepinen qadaǵalawǵa alınıp úyreniw jumısları ámelge asırıldı.

Úyreniw barısında G.E 2020-jıl 12-noybar ayınan baslap Nókis qalası 12-sanlı ulıwma orta bilim beriw mektebiniń direktor lawazımında jumıs islep kelmeke. 2024-jılı G.E nıń unamsız is háreketleri ushın huqıq qorǵaw uyımları tárepinen sorastırıw isleri ámelge asırılıp, sud processleri alıp barıldı. Qaraqalpaqstan Respublikası sudınıń 2025-jıl 18-mart kúngi xatı, Qaraqalpaqstan Respublikası sudı jınayat isleri boyınsha sudlaw kollegiyası apellyatciya instanciyasınıń 2025-jıl 19-fevraldaǵı uyǵarıwı hám Ózbekstan Respublikası Miynet Kodeksiniń 168-statyası 3-bánti menen 2025-jılı 18-mart kúni Qaraqalpaqstan Respublikası Mektepke shekemgi hám mektep bilimlendiriw ministriniń arnawlı buyrıǵına tiykar Nókis qalası 12-sanlı ulıwma orta bilim beriw mektep direktorı G.E nıń miynet shártnaması biykar etilgenligin hám usı mekteptiń oqıw isleri boyınsha direktor orınbasarı Nókis qalası Mektepke shekemgi hám mektep bilimlendiriw bóliminiń usınısı menen mektep direktorı lawazım wazıypası waqtınsha atqarıwshı etip júkletilgenligin málim etip bildiremiz.

Maǵlıwmat ushın:
Direktor lawazımına ashıq tańlaw ótkeriw boyınsha tártip – tańlaw ulıwma orta bilim beriw mákemelerinde bos (vakant) bolǵan direktor lawazımlarına belgilengen mamanlıq talaplarına muwapıq eń ılayıqlı talabandı dáslepki tańlawdan ótkeriw hám Direktorlar keńesi usınısı tiykarında jumısqa qabıl etiw maqsetinde ótkeriledi.

Mektep direktorı lawazımı ushın qánigelik talapları:

-keminde bakalavr dárejesindegi joqarı maǵlıwmat;
-menedjerlik sertifikatı;
-bilimlendiriw tarawında keminde 5 jıllıq pedagogikalıq staj;
-shet tillerdi hám málimleme kommunikaciya texnologiyalarınan paydalanıwdı biliwi (tańlaw procesinde ústinlik beredi).

QR Mektepke shekemgi hám mektep bilimlendiriw ministrliginiń Málimleme xızmeti