Usı jıldıń 5-fevral kúni Qaraqalpaqstan Respublikası Mektepke shekemgi hám mektep bilimlendiriwi ministrligi hám Qaraqalpaqstan Respublikası “Keleshek” orayı menen birgelikte “Keleshekke qaray birinshi qádem” súreni astında baspasóz konferenciyası bolıp ótti.

Ilajda Qaraqalpaqstan Respublikası Mektepke shekemgi hám mektep bilimlendiriwi ministriniń orınbasarı Q.Ismailov, Pedagogikalıq sheberlik orayınıń direktorı G.Kojabaeva, “Keleshek” orayınıń direktorı R.Tashimov hám ǵalaba xabar qurallarınıń wákilleri qatnastı.

Baspasóz ánjumanında “Keleshek” orayınıń direktorı R.Tashimov 2026-jıldan baslap “Bárkamal áwlad” balalar mektepleri negizinde shólkemlestirilgen “Keleshek” orayları, olardıń maqset hám wazıypaları, tiykarǵı baǵdarları jáne ámelge asırılıp atırǵan reformalar haqqında tolıq maǵlıwmat berdi.

Atap ótilgenindey, bul baslamalar Ózbekstan Respublikası Prezidentiniń 2025-jıl 8-sentyabrdegi PQ-277-sanlı “Mektepten tısqarı bilimlendiriw sistemasın jańa basqıshqa alıp shıǵıw ilajları haqqında”ǵı qararı tiykarında ámelge asırılmaqta.

Ilaj dawamında ǴXQ wákilleri ózlerin qızıqtırǵan sorawlarǵa juwapker basshılardan hár tárepleme juwaplar aldı.

Baspasóz konferenciyası juwmaǵında qatnasıwshılar “Keleshek” orayında jumıs alıp barıp atırǵan dógerekler menen jaqınnan tanısıp, ol jerde jaratılǵan sharayatlarǵa joqarı baha berdi.