Moynaq rayonı Mektepke shekemgi hám mektep bilimlendiriwi bólimine qaraslı bilimlendiriw mákemeleriniń basshıları ushın elimizdiń tariyxıy hám ruwxıy miyrasın jaqınnan úyreniwge qaratılǵan aǵartıwshılıq sayaxat shólkemlestirildi.

Sayaxattıń dáslepki mánzili Ózbekstan Islam civilizaciyası orayı boldı. Qatnasıwshılar usı zamanagóy ilim-aǵartıwshılıq orayında jámlengen siyrek ushırasatuǵın tariyxıy eksponatlar menen jaqınnan tanısıp, elimizden jetisip shıqqan ullı oyshıllardıń ómiri hám ilimiy jumısı, olardıń dúnya civilizaciyasınıń rawajlanıwına qosqan úlken úlesi jáne xalqımızdıń bay mádeniy hám ilimiy miyrası haqqında tolıq maǵlıwmatlarǵa iye boldı.

Sonday-aq, sapar dawamında mákeme basshıları Samarqand wálayatındaǵı Imam al-Buxariy estelik kompleksi hám Registan maydanın zıyarat etip, bul tariyxıy esteliklerdiń dóretiwshilik tariyxı, arxitekturalıq qádiriyatı hám ruwxıy áhmiyeti menen jaqınnan tanıstı.

➖ Bunday aǵartıwshılıq sayaxatlar bilimlendiriw sisteması basshılarınıń tariyxıy yadın hám milliy ózlikti bekkemlew, ruwxıy dúnyaqarasın bayıtıw, jas áwladtı watansúyiwshilik hám milliy qádiriyatlarǵa húrmet ruwxında tárbiyalaw baǵdarındaǵı juwapkershiligin bunnan bılay da arttırıwda úlken áhmiyetke iye.