Tariyxıy orınlarǵa sayaxat shólkemlestirildi

Shomanay rayonı Mektepke shekemgi hám mektep bilimlendiriwi bólimine qaraslı mákeme basshıları ushın ishki turizmdi rawajlandırıw, tariyxıy-mádeniy miyrasımızdı keńnen úgit-násiyatlaw hám ruwxıy-aǵartıwshılıq kózqarasın bayıtıw maqsetinde tariyxıy orınlarǵa sayaxat shólkemlestirildi.

Sayaxat Qaraqalpaqstan Respublikasınıń tariyxıy-arxitekturalıq estelikleriniń biri Shılpıq qorǵanınan baslandı. Qatnasıwshılar bul áyyemgi esteliktiń kóp ásirlik tariyxı, arxitekturalıq ózgeshelikleri hám xalqımızdıń civilizaciyasındaǵı ornı haqqında tolıq maǵlıwmatlarǵa iye boldı.

Keyingi mánzil áyyemgi Xiywa qalası bolıp, qatnasıwshılar kók plitkaları menen dańqqa erisken Kelte Minar, Xiywa xanlarınıń rezidenciyası bolǵan Kohna Ark, naǵıslı bezekleri menen ajıralıp turatuǵın Tashháwli sarayı, 200 den aslam aǵash ústinleri menen belgili Juma meshiti hám Xiywadaǵı eń biyik arxitekturalıq imarat esaplanǵan Islamxoja minarası menen jaqınnan tanıstı.

Sayaxat Arda Xiywa kompleksine barıw menen juwmaqlandı. Qatnasıwshılar tariyxıy estelikler, milliy qádiriyatlar hám ata-babalarımızdıń bay mádeniy miyrası menen jaqınnan tanısıp, ózlerinde umıtılmas tásirler aldı.

Tariyxıy orınlarǵa shólkemlestirilgen bul sayaxat qatnasıwshılarda ata-babalarımız qaldırǵan biybaha miyrasqa bolǵan joqarı húrmet sezimin jáne de kúsheytip, milliy tariyxımız hám mádeniyatımızdı tereńirek túsiniw imkaniyatın berdi.