Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen “Korrupciyaǵa qarsı gúresiw” aylıǵı sheńberinde Nókis qalasında jaylasqan Temurbekler mektebinde Ózbekstan Respublikası Korrupciyaǵa qarsı gúresiw huqıqıy qadaǵalaw basqarmasınıń xızmetkeri E.Xudaybergenov, Qaraqalpaqstan Respublikası Mektepke shekemgi hám mektep bilimlendiriwi ministri G.Kojabaeva, Ózbekstan Respublikası Bas prokuraturası janındaǵı Ekonomikalıq jınayatlarǵa qarsı gúresiw departamenti Qaraqalpaqstan Respublikası basqarması bólim baslıǵı R.Sadikov, barlıq rayonlıq (qalalıq) mektepke shekemgi hám mektep bilimlendiriwi bólimleriniń baslıqları, mektepke shekemgi hám mektep direktorları hám ǵalaba xabar quralları qatnasıwında “Korrupciyaǵa qarsı birgelikte gúresemiz!” atamasında respublikalıq seminar sheńberinde ashıq sáwbet shólkemlestirildi.
Sońǵı jıllarda mektepke shekemgi hám mektep bilimlendiriwi tarawında mámleketlik basqarıw sistemasın shólkemlestiriw, zamanagóy málimleme texnologiyaların qollanıw, basqarıw processlerin sanlastırıw arqalı xızmetlerdiń sapasın arttırıw, mámleketlik hám mámleketlik emes mektepke shekemgi hám mektep bilimlendiriwi mákemeleriniń jumısın bunnan bılay da rawajlandırıw baǵdarında keń kólemli reformalar ámelge asırılmaqta.
Atap aytqanda, Mektepke shekemgi hám mektep bilimlendiriwi ministrliginiń shólkemlerinde korrupciyaǵa qarsı gúresiw boyınsha bir qatar ilajlar ámelge asırılıp, bul tarawda qabıl etilgen ishki hújjetler jáne jańadan qabıl etilgen nızamshılıq hújjetleri tiykarında olarǵa kirgizilgen ózgerisler hám qosımshalar tekstlerindegi normalardıń áhmiyeti tanıstırılıp, kepillik xatları rásmiylestirildi.
Sistemada jumıs islep atırǵan xızmetkerdiń korrupciyaǵa qarsı gúresiw boyınsha mamanlıǵı arttırılmaqta. Pedagog xızmetkerler 12 saatlıq “Korrupciyanıń aldın alıw hám oǵan qarsı gúresiw” temasında oqıtılmaqta.
Korrupciyaǵa qarsı gúresiw boyınsha 2023-2024-jıllarǵa mólsherlengen Mámleketlik baǵdarlamada ministrlikke júklengen ilajlardıń orınlanıwı, sonday-aq, “Korrupciyasız taraw” joybarın ámelge asırıw boyınsha “Jol kartası” orınlanbaqta.
“Mápler soqlıǵısıwı haqqında”ǵı Nızamdı ámelge asırıw boyınsha uyımlıq baǵdarlama tastıyıqlanıp, bir qatar ilajlarǵa baylanıslı, Mektepke shekemgi hám mektep bilimlendiriw sisteması xızmetkerlerinde korrupciyaǵa qarsı keńpeyilliksiz múnásibetti qáliplestiriw, olardıń huqıqıy sanası hám mádeniyatın bunnan bılay da arttırıw, korrupciyaǵa qarsı profilaktika ilajlardı shólkemlestiriw hám aldınǵı tekseriwlerde kórsetilgen qaǵıydabuzarlıqlardıń saplastırılıwı ústinen qadaǵalawdı ámelge asırıw maqsetinde, “Korrupciyaǵa qarsı gúresiw aylıǵı” járiyalanıp, 2024-jıldıń 1-noyabrinen 1-dekabrine shekem ótkerilmekte.
“Korrupciyaǵa qarsı gúresiw aylıǵı” sheńberinde xızmetkerler menen profilaktikalıq sáwbetler, hár bir xızmetkerdi qamtıp alǵan halda korrupciyaǵa baylanıslı huqıqbuzarlıqlardıń aldın alıwǵa qaratılǵan oqıw sabaqları, treningler, “Korrupciyanıń aldın alıw hám oǵan qarsı gúresiw” temasında xızmetkerlerdiń “Korrupciyaǵa qarsı gúresiw virtual akademiyası” elektron platformasında mamanlıǵı arttırılmaqta.
Sonday-aq, mektepke shekemgi bilimlendiriw mákemeleri tárbiyalanıwshılarında korrupciya túsinigin jasqa sáykes túrde túsindiriw, ádep-ikramlılıq qaǵıydalarına ámel etiw, hadallıq hám ádalatlılıq sıyaqlı pazıyletlerdi qáliplestiriwge qaratılǵan ilajlar, ulıwma orta bilimlendiriw mákemelerinde “Oqıwshı jaslar hadallıq tárepdarı” 10 kúnligi shólkemlestirildi. Sistemadaǵı joqarı bilimlendiriw, mektepke shekemgi hám mektep bilimlendiriw mákemeleri jáne shólkemlerinde “Jaslar korrupciyaǵa joq deydi” atamasında eń jaqsı súwretler tańlawı, sistemadaǵı joqarı bilimlendiriw mákemeleriniń sociallıq tarmaqlarındaǵı betlerinde “Stop korrupciya heshtegi” shellenji, ata-analar arasında “Pútkilley paydalanıwshılardıń bilimlendiriw xızmetleriniń sapasınan qanaatlanıw “Korrupciyaǵa qarsı gúresiw hápteligi,” óz jumıslarınıń ashıq-aydınlıǵın támiyinlew, korrupciyalıq qáwip-qáterlerdiń aldın alıw hám saplastırıw boyınsha “Ashıq esikler kúni” ilajları ótkerilmekte.
Respublikalıq seminar sheńberinde shólkemlestirilgen ashıqtan-ashıq sóylesiwde barlıq pedagoglar ózlerin qızıqtırǵan sorawlarǵa, qánigeler tárepinen juwaplar aldı. Sonday-aq, ilaj qatnasıwshıları “Korrupciyaǵa qarsı gúresiw” aylıǵı sheńberinde barlıq pedagog kadrlardı belsene qatnasıwǵa shaqırdı.
QR Mektepke shekemgi hám mektep bilimlendiriw ministrliginiń Málimleme xızmeti
