Social tarmaqlar arqalı Beruniy rayonı 22-sanlı ulıwma orta bilim beriw mektebinde islewshi xızmetkerler arasında narazılıqlar hám mektepte anıqlanǵan qáte-kemshlikler haqqında tarqalǵan video múrájat boyınsha Qaraqalpaqstan Respublikası Mektepke shekemgi hám mektep bilimlendiriw ministrligi tárepinen isshi topar dúzilip, úyreniw jumısları alıp barıldı.

Beruniy rayonı 22-sanlı ulıwma orta bilim beriw mektebinde alıp barılǵan úyreniw jumısları nátiyjesi boyınsha tómendegiler anıqlandı.

Atap aytqanda, mektepte oqıw-tárbiya processi, miynet nızamshılıǵı, xızmetkerlerdi jumısqa qabıl etiw tártibi, jámáátte salamat ortalıǵınıń támiyinleniwi, pedagoglarǵa sabaqlardıń bólistiriliwinde nızam talaplarına ámel etiwi hámde sanitariyalıq-gigienalıq qaǵıydalar boyınsha bir qatar qáte-kemshiliklerge jol qoyılǵan.

Sonıń menen bir qatarda, ministrliktiń isshi topar aǵzaları tárepinen mekteptiń jámi 34 pedagog xızmetkerlerdiń qatnasında sáwbet ótkerilip, sáwbetlesiw processinde sabaqlardıń bólistiriliwinde hesh qanday pul jıynaw jaǵdayları ushıraspaǵanlıǵı málim boldı. Bul boyınsha mektep muǵallimleri ózleriniń túsinik xatlarında keltirip ótti hámde tastıyıqlawshı dáliller anıqlanbadı.

Anıqlanǵan qáte-kemshilikler boyınsha mektep direktorına nızam talaplarına ámel etpesten óz xızmet wazıypalarına nemquraydılıq penen qaraǵanlıǵı ushın Ózbekstan Respublikası Miynet Kodeksiniń 312-statyası 1-bóliminiń 2-bántine tiykar «Ortasha aylıq is haqınıń otız (30%) payızı muǵdarında járiyma» intizamiy jaza sharası qollanılǵanlıǵın málim etip bildiremiz.

QR Mektepke shekemgi hám mektep bilimlendiriw ministrliginiń Málimleme xızmeti