Jáhán banki qatnasıwında ámelge asırılıp atırǵan “Ekonomikalıq ósiw ushın mektep bilimlendiriwin transformaciyalaw” joybarı sheńberinde usı jıldıń 17-20-yanvar kúnleri Jáhán banki wákilleri hám Ózbekstan Respublikası Mektepke shekemgi hám mektep bilimlendiriw ministrliginiń juwapker xızmetkerleri Qaraqalpaqstan Respublikasında xızmet saparında boldı.

➖ 17-yanvar kúni miymanlar Moynaq rayonında bolıp, 1-sanlı ulıwma bilim beriw mektebinde oqıwshılarǵa jaratılǵan sharayatlar, materiallıq-texnikalıq baza hám tálim-tárbiya processi menen tanıstı. Sonday-aq, 2025-jıl Investiciya baǵdarlaması sheńberinde qosımsha oqıw imaratı qurılǵan 1-sanlı qánigelestirilgen mekteptegi sharayatlar kózden ótkerildi.

➖ 18-yanvar kúni Nókis qalasındaǵı “Abat mákan” MPJ aymaǵında quwatlılıǵı 1650 orınǵa mólsherlengen jańa mektep qurılısı rejelestirilgen 1,4 gektar jer maydanında kommunikaciya tarmaqlarına jalǵanıw jaǵdayı úyrenildi. Sonday-aq, “Shımbay gúzarı” MPJda jaylasqan 49-sanlı ulıwma bilim beriw mektebindegi sharayatlar menen tanıstı.

➖ 19-yanvar kúni bolsa Nókis qalası “Jańabazar” MPJ aymaǵında jańadan qurılǵan, 870 oqıwshı orınǵa mólsherlengen 55-sanlı ulıwma orta bilim beriw mektebi, zamanagóy bilimlendiriw ortalıǵı hám materiallıq-texnikalıq bazası menen tanıstı.

Usı kúni Qaraqalpaqstan Respublikası Ministrler Keńesi Baslıǵınıń orınbasarı B.Utemuratovtıń basshılıǵında Jáhán banki wákilleri menen birgelikte jańa mekteplerdiń qurılısı, jer maydanları, texnikalıq talaplar hám joybarlaw processlerine baylanıslı áhmiyetli máseleler dodalandı.