2026-jıldıń 24-fevral kúni Ózbekstan Respublikası Prezidenti tárepinen jaslar menen olardıń baslamaların qollap-quwatlaw boyınsha qosımsha imkaniyatlarǵa baǵıshlanǵan ushırasıwı dawamında Mámleketimizde hár hápteniń piyshembi kúni ministrlik, mákeme hám hákimliklerde “Jaslar kúni” bolıwı belgilep berilgen edi. Bul baslama jaslardıń pikir-usınısların tıńlaw, olardıń usınıs hám baslamaların qollap-quwatlaw, sonday-aq, bilimlendiriw sistemasındaǵı reformalardı bunnan bılay da jetilistiriwge xızmet etpekte. Usı baslamanıń orınlanıwın támiyinlew maqsetinde Qaraqalpaqstan Respublikası Mektepke shekemgi hám mektep bilimlendiriwi ministri w.a. M.Shlımbetovanıń Nókis qalasındaǵı Prezident mektebinde qábiletli oqıwshı qızlar menen ashıq sáwbet shólkemlestirildi.
Ilajda mámleketimizde bilimlendiriw tarawında ámelge asırılıp atırǵan reformalar, jaslar ushın jaratılıp atırǵan imkaniyatlar, ásirese, qızlardıń bilim alıwı hám óz potencialın rawajlandırıwı ushın jaratılıp atırǵan sharayatlar haqqında pikir alısıldı. Sóylesiw dawamında qábiletli oqıwshı qızlar ózlerin qızıqtırǵan sorawlar menen múrájat etip, bilimlendiriwdiń sapası, zamanagóy bilim hám kónlikpelerdi iyelew, xalıqaralıq pán olimpiadalarında qatnasıw, ilimiy jumıs penen shuǵıllanıw hám keleshek rejeleri haqqında pikirlerin bildirdi. Sonday-aq, olar tárepinen alǵa qoyılǵan usınıs hám ideyalar dıqqat penen tıńlanıp, olardı ámelge asırıw boyınsha tiyisli usınıslar berildi. Ushırasıw qızǵın hám ashıq sóylesiw ruwxında ótti. Bunday ushırasıwlar jaslardıń pikirin tıńlaw, olardı qollap-quwatlaw, qábiletin rawajlandırıw hám keleshekte mámlekettiń rawajlanıwına úles qosatuǵın bilimli hám belsendi áwladtı tárbiyalawda úlken áhmietke iye. Ilaj sońında qatnasıwshı qızlar mámleket tárepinen jaslarǵa berilip atırǵan imkaniyatlar ushın minnetdarshılıq bildirip, keleshekte elimizdiń rawajlanıwına múnásip úles qosıwǵa wáde berdi. 
