Ózbekstan Respublikası Prezidentiniń 2025-jıl 30-yanvardaǵı PP-16-sanlı Pármanınıń orınlanıwın támiyinlew, mektepke shekemgi bilimlendiriw shólkemleri, ulıwma orta bilim beriw hámde aymaqta jaylasqan joqarı bilimlendiriw mákemelerinde jumıs alıp barıp atırǵan psixologlar hám professor-oqıtıwshılardıń kásiplik kompetenciyaların rawajlandırıw, olardı zamanagóy psixologiyalıq-pedagogikalıq jantasıwlar, profilaktikalıq hám korrekciyalıq jumıs usılları menen támiyinlew, bilimlendiriw mákemelerinde salamat sociallıq-psixologiyalıq ortalıqtı bekkemlew maqsetinde Bilimlendiriwdi rawajlandırıw respublikalıq ilimiy-metodikalıq orayı tárepinen usı jıldıń yanvar-aprel aylarında aymaqlarda “Bilimlendiriwde psixologiyalıq abadanlıqtı birgelikte jaratamız” atamasında oqıw-seminar shólkemlestirildi. Bul oqıw-seminarlar ámeliy baǵdarlanǵan bolıp, olarda psixologiyalıq xızmetti shólkemlestiriw, psixoprofilaktika, psixodiagnostika, mashqalalı jaǵdaylardı erte anıqlaw, korrekciyalıq jumıslardı rejelestiriw hám ata-ana jáne pedagoglar menen birgelikte islewdiń nátiyjeli usılları boyınsha bilim hám kónlikpelerdi tereńlestiriwge ayrıqsha itibar qaratıldı. Atap aytqanda, 2026-jıl 7-aprel kúni Qaraqalpaqstan Respublikasında mektepke shekemgi bilimlendiriw shólkemleri hám mektep bilimlendiriw mákemeleriniń psixologları ushın oflayn hám basqa da barlıq aymaqlar ushın “ZOOM” platforması arqalı onlayn tárizde oqıw-seminarları ótkerildi. Oqıw-seminarǵa Qaraqalpaqstan Respublikasınan jámi 68 mektepke shekemgi bilimlendiriw shólkemleri hám mektep bilimlendiriw mákemeleriniń psixologları qamtıp alındı. Seminarlar dawamında 2 aymaqlıq trenerler hám 6 járdemshi trenerler tárepinen “Neyropsixologiya,” “Art-terapiya metodları (ertek, qum art terapiya hám basqalar) ” hám “Proekciyalıq metodikalar hám olardı qollanıw ámeliyatı” temalarında trening sabaqları ótkerildi. Oqıw-seminarlar juwmaǵında bilimlendiriw sistemasında psixologiyalıq xızmetti jetilistiriw, pedagoglardıń kásiplik potencialın arttırıw hám oqıwshılar, ata-analar hám pedagoglar ushın turaqlı psixologiyalıq ortalıqtı qáliplestiriwge qaratılǵan bul ilajda nátiyjeli birge isleskeni ushın aymaqlıq trenerlerge minnetdarshılıq xatları, trening sabaqlarında belsene qatnasqan tıńlawshılarǵa sertifikatlar tapsırıldı. Bul oqıw-seminarlar psixologlardıń kásiplik kompetenciyaların rawajlandırıw, ámeliy jumıs usılların bayıtıw, mashqalalı jaǵdaylardı erte anıqlaw hám aldın alıw boyınsha birden-bir kózqarastı qáliplestiriwge jáne aymaqlarda psixologiyalıq xızmet sapasın arttırıw boyınsha gezektegi basqıshlı jumıslar ushın metodikalıq-ámeliy tiykar bolıp xızmet etedi. 
