Usı jıldıń 17-iyun kúni Qaraqalpaqstan Respublikasında mámleketlik emes mektepke shekemgi bilimlendiriw shólkemleriniń jumısın bunnan bılay da jetilistiriw, tarawǵa baylanıslı mashqalalardı úyreniw hám isbilermenlerdi qollap-quwatlaw maqsetinde ashıq sáwbet shólkemlestirildi.
Ózbekstan Respublikası Ministrler Kabinetiniń 2022-jıl 2-avgusttaǵı 426-sanlı qararı talapları tiykarında ótkerilgen usı ilajda shańaraqlıq hám mámleketlik-jeke sheriklik tiykarında jumıs alıp barıp atırǵan mámleketlik emes mektepke shekemgi bilimlendiriw shólkemleriniń shólkemlestiriwshi isbilermenleri qatnastı.
Ashıq sáwbette Ózbekstan Respublikası Mektepke shekemgi hám mektep bilimlendiriwi ministrliginiń Mámleketlik emes mektepke shekemgi bilimlendiriw shólkemleri jumısların muwapıqlastırıw bólimi baslıǵı Sirojiddin Xudayquliev qatnasıp, mámleketlik emes mektepke shekemgi bilimlendiriw sistemasın rawajlandırıw, mámleket tárepinen jaratılıp atırǵan imkaniyatlar hám ámeldegi tártipler boyınsha tolıq maǵlıwmat berdi.
Sáwbet dawamında isbilermenler tárepinen kóterilgen máseleler, atap aytqanda, nodavlat-bogcha.uz elektron platforması arqalı júzege kelip atırǵan texnikalıq hám shólkemlestiriwshilik mashqalalar hár tárepleme dodalandı. Qánigeler tárepinen bul mashqalalardı saplastırıw mexanizmleri, sistemadan nátiyjeli paydalanıw boyınsha ámeliy usınıslar hám zárúr túsinikler berildi.
