️Bozataw rayonında bilimlendiriw sistemasınıń áhmiyetli máseleleri dodalandı
Búgin Bozataw rayonı Mektepke shekemgi hám mektep bilimlendiriwi bólimine qaraslı rayondaǵı barlıq mektepke shekemgi bilimlendiriw shólkemleriniń basshıları hám ulıwma orta bilim beriw mektepleriniń direktorları qatnasıwında ashıq sáwbet bolıp ótti.
Onda ministr Amanjol Ayapov qatnasıp, bilimlendiriw sistemasında ámelge asırılıp atırǵan reformalar, tarawda alıp barılıp atırǵan jumıslar hám aldaǵı áhmiyetli wazıypalar boyınsha óz pikir-usınısların bildirdi.
Atap ótilgenindey, búgingi kúnde Bozataw rayonında jámi 19 mektepke shekemgi bilimlendiriw shólkemi jumıs alıp barmaqta. Sonnan 13 i mámleketlik, 6 ı shańaraqlıq mektepke shekemgi bilimlendiriw shólkemi bolıp, balalardı mektepke shekemgi bilimlendiriw shólkemine qamtıp alıw dárejesi 71,9 payızdı quraydı. Sonday-aq, rayonda 14 ulıwma orta bilim beriw mektebi jumıs alıp barmaqta.
Ashıq sáwbette bilimlendiriw sistemasına baylanıslı bir qatar áhmiyetli máseleler de hár tárepleme dodalandı.
Sonnan:
➖ Balalardı mektepke shekemgi bilimlendiriw shólkemine qamtıp alıw kórsetkishin jáne de arttırıw;
➖ Oqıwshılar arasında huqıqbuzarlıq hám jınayatshılıqtıń aldın alıw boyınsha profilaktikalıq jumıslardı kúsheytiw;
➖ Jaslardı hár qıylı jat ideyalar hám diniy aǵımlardıń tásirinen saqlaw baǵdarında bilimlendiriw mákemeleri basshıları hám pedagoglardıń juwapkershiligin bunnan bılay da arttırıw;
➖ Pedagoglardıń attestaciyaǵa puqta tayarlıq kóriwi, kásiplik bilim hám mamanlıǵın turaqlı arttırıp barıwı;
➖ Bilimlendiriw mákemelerin 2026-2027-oqıw jılına hár tárepleme sapalı tayarlaw máselelerine ayrıqsha itibar qaratıldı.
Sonday-aq, oqıwshı-jaslar arasında milletleraralıq tatıwlıq, óz-ara húrmet, keńpeyillik hám watansúyiwshilik pazıyletlerin qáliplestiriwge qaratılǵan ruwxıy-aǵartıwshılıq ilajlardı sistemalı shólkemlestiriw hám bul baǵdardaǵı jumıslardıń nátiyjeliligin arttırıw boyınsha juwapkerlerge anıq wazıypalar belgilep berildi.
