Búgin jaslardıń bilim hám oy-pikirin rawajlandırıw, olardı ilim, kitapqumarlıq hám aǵartıwshılıqqa baǵdarlaw turaqlı rawajlanıwdıń áhmiyetli shártlerinen biri bolıp esaplanadı.
Usı maqsette “Yuksalish” háreketi tárepinen jolǵa qoyılǵan “Ziyalı keleshek” joybarı sheńberinde Qaraqalpaqstanda da bir qatar iygilikli jumıslar ámelge asırılmaqta.
Gezektegi baslama Nókis rayonındaǵı “Aqterek” MPJ aymaǵında jaylasqan 10-sanlı ulıwma orta bilim beriw mektebinde ámelge asırıldı. Joybar sheńberinde mekteptiń 2 oqıw klasında ońlaw jumısları alıp barılıp, xanalardıń polları jańadan qaǵıp berildi.
Bul iygilikli is “BIOGUMIS” fermer xojalıǵı baslıǵı Sh. Niyazımbetovtıń qarjılay járdemi menen ámelge asırıldı.
Bilimlendiriwdiń sapası tek ǵana sabaq processi emes, al oqıwshılar ushın jaratılǵan qolaylı, qáwipsiz hám ıqsham ortalıq penen de tıǵız baylanıslı.
Jańalanǵan klass xanaları oqıwshılardıń sapalı bilim alıwı, sabaqlarǵa qızıǵıwshılıq penen qatnasıwı hám óz potencialın tolıq kórsetiwi ushın jáne de múnásip sharayat jaratadı.
Bunday awızbirshilikke tiykarlanǵan iygilikli isler – jas áwlad ushın múnásip sharayat jaratıw, olardıń keleshegine investiciya kirgiziwdiń ayqın úlgisi bolıp esaplanadı.
