Sociallıq tarmaqlarda Qaraqalpaqstan Respublikası ayırım ulıwma orta bilim beriw mekteplerine sút ónimleri belgilengen talaplarǵa muwapıq jetkerip berilmegeni boyınsha tómendegilerdi málim etemiz.
Qaraqalpaqstan Respublikası ulıwma orta bilim beriw mektepleriniń 7-11 jastaǵı oqıwshıları ushın tastıyıqlanǵan 5 kúnlik awqatlanıwda 1-kúnlik taǵamnama boyınsha 2,0-3,2 payız maylılıqtaǵı, 125 ml kólemdegi, kartonlı Tetra Pak qadaqtaǵı sút ónimi belgilengen.
2026-jıl 26-oktyabr kúni ayırım mekteplerge keytering shólkemi tárepinen tastıyıqlanǵan taǵamnamada belgilengen kartonlı Tetra Pak qadaqtaǵı súttiń ornına plastik ıdıstaǵı 125 ml sút ónimi jetkerip berilgen. Bul ónimler mekteplerde dúzilgen arnawlı komissiyalar tárepinen qabıl etilip, mekteplerde alıp qalınǵan.
Anıqlanǵan jaǵday boyınsha mekteplerde dúzilgen arnawlı komissiyalardıń jumısın jetilistiriw hám ónimlerdi qabıllaw processindegi qadaǵalawdı kúsheytiw boyınsha tiyisli ilajlar kórildi.
Sonday-aq, arnawlı komissiya aǵzalarına bunday jaǵdaylar qaytalanbawı boyınsha túsinik jumısları alıp barılıp, qatań eskertiw berildi. Bunnan tısqarı, keytering shólkemine ónimlerdi tastıyıqlanǵan taǵamnama talaplarına muwapıq jetkerip beriw boyınsha eskertiw xatı jiberilgenligin málim etemiz.
















