Aldın xabar bergenimizdey, búgin Nókis qalasındaǵı 55-sanlı ulıwma orta bilim beriw mektebinde jetekshi sırt el joqarı bilimlendiriw mákemelerinde bilim alıwǵa tayarlawǵa baǵdarlanǵan Foundation kurslarına qabıllaw test sınaqları bolıp ótti.
Bul qabıllaw processinde Qaraqalpaqstan Respublikasınan jámi 350 ge shamalas oqıwshı qatnasıw ushın hújjet tapsırǵan. Test sınaqları nátiyjelerine bola, eń joqarı kórsetkishke erisken 25 oqıwshı kurslarda bilim alıw imkaniyatın qolǵa kirgizedi.
Bul baǵdarlama arqalı oqıwshılar málimleme texnologiyaları (IT) baǵdarında tereńlestirilgen bilim alıp, xalıqaralıq dárejedegi bilim hám kónlikpelerdi iyelew imkaniyatına iye boladı.
Bilimlendiriw processleri Ullı Britaniyanıń RQF akademiyalıq standartları tiykarındaǵı IQAC Level 3 baǵdarlaması boyınsha shólkemlestiriledi. Baǵdarlamanı tabıslı tamamlaǵan oqıwshılarǵa xalıqaralıq standartlarǵa teńlestirilgen IQAC Level 3 Diploma in Information Technology (IT) diplomı beriledi.
Eń áhmiyetlisi, bul diplomǵa iye bolǵan pitkeriwshiler ushın jańa imkaniyatlar esigi ashıladı. Sonıń ishinde, olar Ullı Britaniyanıń bul baǵdarlama tiykarında bilim beretuǵın 3 joqarı bilimlendiriw mákemesine hám Ózbekstan Respublikasındaǵı 16 joqarı bilimlendiriw mákemesiniń tiyisli fakultetlerine 2-kurstan oqıwǵa kiriw imkaniyatına iye boladı.

















