QOŃÍRATTA BILIMLENDIRIW TARAWÍNDAǴÍ ÁHMIYETLI WAZÍYPALAR DODALANDÍ
Búgin Qońırat rayonı “Keleshek orayı” májilisler zalında bilimlendiriw sistemasındaǵı áhmiyetli máseleler hám keleshektegi tiykarǵı wazıypalarǵa baǵıshlanǵan ushırasıw bolıp ótti.
Onda ministr Amanjol Ayapov, rayondaǵı ulıwma orta bilim beriw mektepleri hám mámleketlik mektepke shekemgi bilimlendiriw shólkemleriniń direktorları, sonday-aq, mámleketlik emes shańaraqlıq hám mámleketlik-jeke menshik sheriklik tiykarındaǵı mektepke shekemgi bilimlendiriw shólkemleriniń basshıları qatnastı.
➖ Ushırasıwda ministr bilimlendiriwdiń sapasın hám nátiyjeliligin arttırıw, mákemelerde tártip-intizamdı bekkemlew jáne gúz-qısqı máwsimdi zıyansız ótkeriw máselelerine ayrıqsha toqtap ótti.
➖ Sonday-aq, mektep hám baqshalarda balalardıń salamat awqatlanıwın támiyinlew, mektepke shekemgi jastaǵı balalardı bilimlendiriw menen qamtıp alıw kórsetkishlerin jaqsılaw, bar sharayatlardı bunnan bılay da jetilistiriw boyınsha áhmiyetli wazıypalar belgilep berildi.
➖ Bunnan tısqarı, “Jasıl mákan” ulıwma milliy joybarında belsene qatnasıw, bilimlendiriw mákemeleriniń aymaqların kóklemzarlastırıw hám korrupciyanıń aldın alıw, sistemada ashıq-aydınlıqtı támiyinlew zárúr ekenligi atap ótildi.
Ushırasıw juwmaǵında bilimlendiriw shólkemleriniń basshılarına belgilengen wazıypalardıń orınlanıwın támiyinlew, bar mashqalalarǵa óz waqtında sheshim tabıw, hár bir baǵdarda juwapkershilik penen jumıs alıp barıw boyınsha tiyisli tapsırmalar hám usınıslar berildi.

















